वामदेव र विष्णु पौडेलबीच चार घण्टा छलफल, कस्तो पाक्यो खिचडी ?

काठमाडाैं । एमाले उपाध्यक्ष वामदेव गौतम र उपप्रधानमन्त्री समेत रहेका नेता विष्णु पौडेलबीच चार घण्टा लामो भेटवार्ता भएको छ । 

प्रधानमन्त्री तथा नेकपा एमालेका अध्यक्ष केपी शर्मा ओलीले नेता वामदेवा गौतमलाई आफ्नो पक्षमा ल्याउने प्रयास गरिरहेका छन् । पछिल्लो समय आफ्ना विश्वासपात्र तथा उपप्रधान तथा अर्थमन्त्री विष्णु पौडेलमार्फत ओलीले आफ्नो सन्देश गौममसक्षम पुर्‍याइरहेका छन् । 

नेपाल समूहको गुटको बैठकमा सहभागी नहुने, तर नयाँ पार्टी खोलेमा साथ दिने सार्वजनिक रुपमा बताए गौतमलाई फकाउन ओलीले पार्टीको संगठन विभाग प्रमुखसमेत रहेका पौडेल सक्रिय बनाइरहेका छन् । 

यसैक्रममा सोमबार बिहान गौतम निवास भैंसेपार्टी पुगेका पौडेल र नेता गौतमबीच छलफल भएको छ । दुई नेताबीचको भेटवार्तालाई उपाध्यक्ष गौतमको सचिवालयले भने सामान्य कुराकानी भनेको छ ।

‘सामान्य कुराकानी भन्ने कुरा छ तर त्यसक्रममा पार्टी विवाद र एकताबारे कुराकानी हुनु स्वभाविक हो’ गौतमका प्रेस संयोजक विश्वमणि सुवेदीको भनाइ छ ।

गण्डकी घटनापछि अध्यक्ष ओली पनि  जेठ २ गते फर्कन लचिलो देखिन थालेको एमालेका नेताहरु बताउँछन् । जस कारण पौडेललाई अघि सारेर एमालेको एकताका लागि फेरि पहल गरिएको हो ।