काठमाडौं । काठमाडौं उपत्यकाका ३ जिल्लाका सीडीओहरुको बैठक आज बस्ने भएको छ । दिउँसो ३ बजे बैठक बस्न लागिएको भक्तपुरका प्रमुख जिल्ला अधिकारी प्रेम प्रसाद भट्टराईले बताए ।
प्रजिअहरुको बैठकले निषेधाज्ञाको समय लम्ब्याउने अथवा मोडालिटी परिवर्तन गर्नेबारे निर्णय गर्दैछन् । पछिल्लो समय काठमाडौं उपत्यकामा कोरोना संक्रमण घट्दै गइरहेको छ ।
वैशाख १६ बाट जारी निषेधाज्ञा पछिल्लो पटक जेठ ३१ सम्म लम्ब्याउने निर्णय गरिएको थियो । काठमाडौं उपत्यकामा पछिल्लो पटक थपिएको निषेधाज्ञा सोमबार सकिदैछ । आजको बैठकमा निषेधाज्ञा एक हप्ता थप गर्ने निर्णय हुन सक्ने बताइएको छ ।
काठमाडौंमा हालसम्म ९ हजार २२९, ललितपुरमा ३ हजार ७४४ र भक्तपुरमा २ हजार ७१० जना सक्रिय कोरोना संक्रमित रहेका छन् ।
