एजेन्सी । एशियाली पावरहाउस अस्ट्रेलियासँगको खेलमा नेपाल पराजित भएको छ।
शुक्रबार राति कतार विश्वकप फुटबलको एसियाली छनोटको दोस्रो चरणअन्तर्गत आफ्नो अन्तिम खेलमा नेपाल अस्ट्रेलियासँग ३–० गोलअन्तरले पराजित भएको हो ।
कुवेतमा भएको खेलमा नेपाल पहिलो हाफमै १० खेलाडीमा सिमित भएको थियो। अस्ट्रेलियाले दोस्रो हाफमा एक गोल मात्र गर्न सक्यो । छैटौँ मिनेटमा अग्रता लिएको अस्ट्रेलियाले ३८ औँ मिनेटमा त्यसलाई दोब्बर बनाएको थियो । खेलको ४५ औँ मिनेटमा नेपालका अनुभवी डिफेन्डर रोहित चन्दले रातो कार्ड पाए ।
अस्ट्रेलियाका खेलाडीलाई डि बक्सबाहिर पछाडिबाट तानेपछि चन्दलाई सोझै रातो कार्ड देखाइएको थियो। अस्ट्रेलियाले ५७ औँ मिनेटमा तेस्रो गोल गर्यो ।
नेपाल ८ खेलबाट ६ अंक जोडेर समूहको चौथो स्थानमा रह्यो । नेपालले चाइनिज ताइपेईविरुद्धका दुवै खेल जितेको थियो। अन्य तीनवटै टोलीसँग भएका सबै खेलमा नेपाल पराजित भएको हो । अस्ट्रेलियासँग पहिलो खेलमा नेपाल ५–० गोलअन्तरले पराजित भएको थियो । नेपाल यसअघि कुवेतसँग ७–० र १–० तथा जोर्डनसँग ३–० र ३–० गोलअन्तरले पराजित भएको थियो । यस्तै चाइनिज ताइपेईलाई भने नेपालले दुवै खेलमा समान २–० गोलअन्तरले पराजित गरेको थियो ।
अब नेपालले एसिया कप छनोटका लागि प्ले अफ खेल्ने छ।
