गण्डकी प्रदेशमा पृथ्वी सुब्बा गुरुङको सरकार ढल्यो

कास्की । गण्डकी प्रदेशका मुख्यमन्त्री पृथ्वीसुब्बा गुरुङ ढलेको छ ।

आज प्रदेशसभामा विश्वासको मत पाउन नसकेपछि मुख्यमन्त्री गुरुङ नेतृत्वको सरकार स्वत ढलेको हो । यसअघि सभामा सबैभन्दा ठूलो दलको नेताको हैसियतमा उनी मुख्यमन्त्री नियुक्त भएका थिए ।

सरकार टिकाउनका लागि ६० सदस्यीय प्रदेशसभामा ३१ मत आवश्यक पर्ने भए पनि उनले जम्मा २७ मत पाएका छन्।

विपक्षमा ३० मत परेको छ । प्रदेशसभा बैेठकमा ५८ जना उपस्थित भए पनि जम्मा ५७ जनाले मतदान गरेका छन् ।

एक जना तटस्थ बसेका छन् । राजीव गुरुङ (दीपक मनाङे) मतदानमा अनुपस्थित भए ।

मुख्यमन्त्रीको प्रस्तावविरुद्ध काँग्रेस, माओवादी केन्द्र, जनमोर्चा र जसपाले मतदान गरेका थिए । ६० सदस्यीय गण्डकीमा विपक्षी गठबन्धनको पनि स्पष्ट बहुमत छैन । तर, दीपक मनाङेले विपक्षीलाई साथ दिए विपक्षीको बहुमत पुग्ने देखिएको छ ।