कसले गराएको छ ओलीसँग ठाकुर–महतो र माधव–झलनाथसँग देउवा–प्रचण्डको गठबन्धनः योगेश भट्टराई

काठमाडौं । एमालेका शीर्षनेताहरुलाई आफ्नै पार्टीका सहयोद्धासँग भन्दा विपक्षीसँग गठबन्धन कसले गराउँदैछ भन्ने प्रश्न नेकपा(एमाले)का युवानेता योगेश भट्टराईले गरेका छन् । 
उनले एमालेका अध्यक्ष केपी शर्मा ओलीलाई आफ्नै  सहयोद्धा झलनाथ खनाल र माधवकुमार नेपालसँग भन्दा महन्थ ठाकुर र राजेन्द्र महतोसँग गठबन्धन किन गर्नुपरेको होला भन्ने प्रश्न गरेका छन् ।

भट्टराईले बरिष्ठ नेताद्वय खनाल र नेपाललाई पनि अध्यक्ष ओलीसँग भन्दा शेरबहादुर देउवा, प्रचण्ड र उपेन्द्र यादवसँग गठबन्धन गर्न तयार हुनुपर्ने परिस्थिति किन आयो ? कसले, किन र केका लागि गर्दैछ यो सब भनी प्रश्न गरेका छन् । एकताको मूल जड नै यहीँ भएको उनको ठोकुवा छ ।

एमालेका शीर्षनेतालाई आफ्ना सहयोद्धासँग भन्दा विपक्षीसँग गठबन्धन गराउने काम कसले गरिरहेको छ भन्ने प्रश्न गर्दै भट्राईले लेखेका छन्–कमरेड केपी ओली आफ्नै पार्टीका बरिष्ठ नेता कमरेड जे एन खनाल र कमरेड माधव नेपालसँग सहकार्य गर्न तयार नहुने तर महन्त ठाकुर र राजेन्द्र महतोसँग सत्ता साझेदारी र अन्य बिषयमा गठबन्धन गर्न तयार हुने ।  

कमरेड जे एन खनाल र माधव नेपाल आफ्नै पार्टीका अध्यक्ष कमरेड केपी ओलीसँग मिल्न तयार नहुने तर शेर बहादुर देउपा, प्रचण्ड र उपेन्द्रसँग सत्ता साझेदारी र अन्य बिषयमा गठबन्धन गर्न तयार हुने ।  

कसले, किन  र के कालागि गर्दैछ यो सब ?

एमाले एकताको समस्याको मूल जड यहीँ छ ।  

यस बिषयमा कमरेडहरुबीचमा गम्भीर छलफल हुनु र साझा निष्कर्षका साथ साझा अभियान मार्फत् एमालेको एकता बचाउन जरुरी छ ।