सुदूरपश्चिम प्रदेशका मुख्यमन्त्री भट्ट विश्वासको मत लिंदै

काठमाडौं । सुदूरपश्चिम प्रदेशका मुख्यमन्त्री त्रिलोचन भट्टको सरकारका पक्षमा मतदान गर्ने एमालेको माधव नेपाल पक्षले निर्णय गरेको छ । माधव नेपाल पक्षले समर्थन गरेका कारण भट्टको सरकार सुरक्षित भएको छ ।

एमालेले सुदूरपश्चिम सरकारबाट समर्थन फिर्ता लिने निर्णय गरे पनि सुदूरपश्चिम संसदीय दलले पार्टीको निर्णयलाई चुनौती दिंदै समर्थन कायमै रहने घोषणा गरेको छ । एमाले संसदीय दलको निर्णयपछि भट्टले माधव नेपाल पक्षका ६ प्रदेशसभा सदस्यलाई मन्त्री र राज्यमन्त्री बनाएका छन् । माधव नेपाल पक्षको साथ पाएका भट्ट विश्वासको मत पाउने कुरामा ढुक्क छन्  ।

यसैबीच नेपाली कांग्रेसले पनि भट्टलाई समर्थन गर्ने निर्णय गरेको छ । भट्टको सरकारलाई सांसदको संख्या नपुगेमा कांग्रेसले समर्थन गर्ने भएको छ । सुदूरपश्चिममा एमालेका २४ सांसदमध्ये १८ माधव नेपाल पक्षमा छन् ।

भट्टलाई एमालेको माधव नेपाल पक्षले समर्थन गरिसकेकाले अरु पार्टीको मत आवश्यक देखिंदैन । नेपाली कांग्रेसले सरकार जोगाउन आवश्यक परेमा मत दिने छ ।  जसपाले भने के गर्ने निर्णय गरिसकेको छैन । प्रधानमन्त्री ओली पक्षका सांसदहरुले भने भट्ट सरकारको विपक्षमा मतदान गर्ने भएका छन् ।

सुदूर पश्चिम प्रदेशसभामा नेकपा एमालेका २४ सांसद छन् । नेकपा माओवादीका १३ र नेपाली कांग्रेसका १२ जना सांसद छन् । जनता समाजवादी पार्टीका दुई जना प्रदेश सभा सदस्य छन्