ओलीको प्रस्तावप्रति माधव समूह सशंकितः एकताका पक्षधर केन्द्रीय सदस्य भनेर कसलाई भनिएको हो ? 

काठमाडौं । नेकपा एमालेका अध्यक्ष केपी शर्मा ओलीले आइतबार साँझ पार्टी एकताका लागि २०७५ जेठ ३ मा फर्किन तयार रहेको वक्तब्य निकालेका छन् । उनको वक्तब्यलाई अदालतको मुद्दा प्रभावित पार्ने चालबाजीका रुपमा माधव नेपाल पक्षका नेताहरुले लिएका छन् । ओलीको प्रस्तावको पहिलो बुँदामा एकताको पक्षधरमा रहेका भनेर माधव नेपाल समूहका केही नरमन्थी नेताहरुलाई मात्र भन्न खोजिएको अर्थमा लिइएको छ ।

माधव नेपाल समूहसँग होइन, त्यो समूहका केही नेताहरुलाई आफूतिर तान्ने निहीत उद्देश्यले ओलीको प्रस्ताव आएको त होइन भन्ने आशंका गर्ने ठाउँ दिएको छ । वाम बुद्धिजीवी कोमल भट्टराईले ओलीको ६ बुँदे प्रस्तावका सम्बन्धमा आशंकासहितका ५ वटा सवाल उठाएका छन्–दुई पटक संसद बिघटन गल्ती हो कि होइन । संसद बिघटन सरकारबाट फिर्ता लिन मिल्छ कि मिल्दैन ? सरकारबाट संसद बिघटन फिर्ता भएपछि स्वतः मुद्दा फिर्ता हुँदैन र ? भट्टराईले लेखेका छन्– यी प्रश्नहरूमा स्पष्ट भएपछि विवाद हल हुन्छ जस्तो देखियो 

भट्टराईले उठाएका सवाल

१. एकताको पक्षधरमा रहेका भनेको के हो ?

२. मूलभूतरूपमा संगठनहरू संचालन भन्नाले भनेको के हो ?

३. दुई पटक संसद विघटन गर्नु गल्ती हो कि होइन ?

४ संसद विघटनविरूद्ध हस्ताक्षर नगरेको भए यो वक्तव्य आउँथ्यो आउँदैनथ्यो ? 

५ संसद विघटन फिर्ता सरकारबाट लिन मिल्छ कि मिल्दैन ?