गणतन्त्र दिवसमा राष्ट्रपतिद्वारा ४३० जनाको कैद माफी, रेशम चौधरी छुटेनन्

काठमाडौं । गणतन्त्र दिवसको अवसर पारेर राष्ट्रपति विद्यादेवी भण्डारीले ४३० कैदीको भुक्तान हुन बाँकी कैद माफी दिएकी छन् । 
बिहीबार बसेको मन्त्रिपरिषद् बैठकले कैद माफीका लागि नाम पठाएको थियो । सरकारको सिफारिसमा राष्ट्रपति भण्डारीले एकसाथ ४३० कैदकिो भुक्तान हुन बाँकी कैद कट्टा गरी माफी दिएकी हुन् ।

राष्ट्रपति कार्यालयका प्रवक्ता केशव घिमिरेले जारी गरेको विज्ञप्तिमा उल्लेख छ–नेपालको संविधानको धारा २७६ बमोजिम फौजदारी कसुर (सजाय निर्धारण तथा कार्यान्वयन) ऐन, २०७४ को दफा ३७, जेष्ठ नागरिक सम्बन्धी ऐन, २०६३ को दफा १२, सर्वोच्च अदालतको संयुक्त इजलासबाट मिति २०७७–४–१९ मा भएको परमादेश (रिट नं ०७६-WO-०९३९० को आदेश, मुलुकी अपराध संहिता, २०७४ को दफा ४५ को उपदफा (४) तथा बालबालिका सम्बन्धी ऐन, २०७५ को दफा ३६ को उपदफा ९४० र फौजदारी कसूर (कैदकट्टा) नियमावली, २०७६ को नियम ३ बमोजिम नेपाल सरकार, मन्त्रिपरिषद्को मिति २०७८–२–१३ गतेको सिफारिसमा मिति २०७८र२र१५ गते देखि लागू हुने कैदीहरुको भुक्तान हुन बाँकी कैद घट्टा भएको हो । 

संविधानको धारा २७६ मा राष्ट्रपतिले कुनै अदालत, न्यायिक वा अर्धन्याकि निकाय वा प्रशासकीय पदाधिकारी वा निकायले गरेको सजायलाई कानुन बमोजिम माफी, मुल्तवी, परिवर्तन वा कम गर्न सक्ने व्यवस्था गरिएको छ ।

४३० कैदीबन्दीको कैद मिनाहा गर्दा सासद (निलम्बित) रेशम चौधरीको कैद भने माफी गरिएको छैन । केपी ओली सरकारले जनता समाजवादी पार्टीका महन्थ ठाकुर र राजेन्द्र महतोलाई आफ्नो समर्थन गराउने क्रममा रेशम चौधरीको रिहाइ गर्ने सहमति गरेको चर्चा हुँदैआएको छ ।