महामारीमा चीनले १० लाख डोज खोप अनुदान दियो, राष्ट्रपतिले नै माग्दा पनि भारतले दिएन 

काठमाडौं । राष्ट्रपति विद्या भण्डारीले बुधबार दिउँसो चीन र भारतका राष्ट्रपतिसँग नेपालीलाई कोरोना संक्रमणबाट बचाउन खोप मागिन् । राष्ट्रपति भण्डारीले चीनका राष्ट्रपति सि चिनफिङसँग फोनवार्ता गर्नासाथ १० लाख डोज खोप नेपाललाई अनुदानमा दिने भएको छ ।

यसैगरी चीनका राष्ट्रपति सि चिनफिङसँग कुरा गर्नुअघि राष्ट्रपति विद्या भण्डारीले भारतका राष्ट्रपति रामनाथ कोविन्दसँग नेपाललाई कोरोना भाइरसविरुद्धको खोप उपलब्ध गराउन पहल गरिदिन भन्दै पत्राचार गरेकी थिइन् । तर भारतले नेपाललाई खोप दिने नदिने अहिलेसम्म पनि जवाफ दिएको छैन । भारतले नेपालले रकम भुक्तानी गरिसकेको १० लाख डोज कोभिसिल्ड खोपमा समेत रोक लगाएको छ । भारतले आफ्नै देशमा आवश्यक भएकाले नेपालमा खोप पठाउन रोक लगाएको बताएको छ । नेपाललाई खोपबापत भुक्तानी भएको रकम नै फिर्ता लग्ने आसय कोभिसिल्ड खोपको उत्पादक कम्पनी सेरुम इन्ष्टिच्यूटले ब्यक्त गरिसकेको छ । तर चीनले नेपालले माग्नासाथ खोप दिएर नेपालीको मन जितेको छ ।

चीन सरकारले नेपाललाई थप १० लाख मात्रा कोभिड–१९  खोप अनुदानस्वरुप प्रदान गर्ने घोषणा गरेको छ । राष्ट्रपति सि चिनफिङसँगको कुराकानीमा कोभिड–१९ विरुद्धको नेपालको लडाइँमा जीवन रक्षक औषधि, चिकित्सा उपकरण र स्वास्थ्य सामग्री प्रदान गरेर नेपाललाई निरन्तर सहयोग गरेकामा राष्ट्रपति भण्डारीले चीन सरकारप्रति कृतज्ञता ज्ञापन गरेकी थिइन् ।

कोभिड–१९विरुद्धको खोप संसारभर सबैका लागि सार्वजनिक वस्तु हुनुपर्ने राष्ट्रपति सीको अभिव्यक्तिको प्रशंसा गर्दै राष्ट्रपति भण्डारीले यसअघि पनि चीनले नेपाललाई आठ लाख मात्रा खोप उपलब्ध गराएकामा आभार व्यक्त गरेकी छन् ।  नेपाललाई चीनबाट कोभिड–१९विरुद्धको खोप खरीदमा सहजीकरणका निम्ति पनि राष्ट्रपतिले आग्रह गरेकी छन् ।