ओलीलाई झड्का, प्रधानमन्त्रीमा महन्थ दाबेदारी

काठमाडौं । केही दिनअघिसम्म पार्टी नै फुट्ला जसरी फरक ढंगले अघि बढेका जनता समाजवादी पार्टीका अध्यक्षद्वय महन्थ ठाकुर र उपेन्द्र यादव एकाएक यु टर्न भएर आफ्नै नेतृत्वमा सरकार बनाउन अगाडि बढ्ने निर्णय गरेका छन् ।

अध्यक्षद्वय ठाकुर र यादवले आज संयुक्त विज्ञप्ति निकालेर आफ्नै पार्टीको नेतृत्वमा सरकार बन्ने अवसर प्राप्त हुन सक्ने अवस्था भएमा अगाडि बढ्ने स्पष्ट पारेसँगै ठाकुर प्रधानमन्त्रीका दाबेदार देखिएका छन्।

जसपाले सरकारको नेतृत्वका लागि अगाडि बढ्ने औपचारिक निर्णय जेठ ८ र ९ मा कार्यकारिणी समितिको बैठकबाट गर्ने भएको छ । 

ओलीलाई साथ दिदै आएका महन्थ एकाएक यु टर्न भई आफ्नै नेतृत्वमा सरकार निर्माणमा बढ्ने भएसँगै उनले काँग्रेस र माओवादी केन्द्रको साथ पाउने सम्भावना पनि बढेर गएको छ । यसले ओलीलाई झड्का पर्ने सम्भावना बढेको छ ।

अबकाे ओलीले २४ दिनभित्र विश्वासको मत लिन नसके बहुमतको सरकार निर्माणको आव्हान राष्ट्रपतिबाट हुन सक्छ । त्यतिबेला ओलीविरोधी गठबन्धनले बहुमत देखाउन सके महन्थ ठाकुर प्रधानमन्त्री बन्ने सम्भावना हुन सक्छ ।