युगखाने संभावना भएकाहरुलाई छाक खाने बाटोमा नलाग्न एमाले नेता रावलको आग्रह

डोल्पा। नेपाल कम्युनिष्ट पार्टी (नेकपा) एमालेका नेता एवं प्रदेशसभा सदस्य दल रावलले कसैको लहीलहीमा लागेर पार्टीबाट अलग हुन नहुने बताएका छन्। 

नेता रावलले पार्टी भित्र रहेकोे केही असहमति र अन्तरसंघर्षलाई उचित ब्यबस्थापन गरेर पार्टीलाई गतिशील बनाउनुको सट्टा बिभाजन तर्फ लागेको भन्दै अलग हुन नहुने बताएका हुन्। 

आफ्नै पार्टीको सरकारलाई बिस्थापित गरेको भन्दै ओली पक्षका रावलले पार्टीका माधव नेपाल पक्षका सांसदहरुलाई ‘युगखाने संभावना भएका नेताहरु छाक खाने’ बाटोमा नलाग्न समेत आग्रह गरेका छन्। 

उनले सामाजिक सञ्जाल फेसबुकमार्फत् यस्तो बताएका हुन्। 

उनको लेख यस्तो छ :

‘कमरेडहरु मलाई पनि सम्झनुभएकोमा धन्यवाद । म नेकपा (एमाले) एकताबद्व रहोस भनी निरन्तर पहल र प्रयास गर्ने एक कार्यकर्ता हु । तर यसलाई कमरेडहरुले समानन्तर गतिविधिमा लागेको जसरि वुझेर वा यसलाई कमजोरी ठानेर मेरो कुनै सहमति बिना प्रदेश तथा जिल्ला कमिटीमा राखेको भनी सामाजिक संजालमा पोस्ट भएको थाहापाए । यसबाट म आश्चर्यचकित भएको छु। 

म कुनै पनि समानान्तर गतिविधि वा कमिटीमा नभै हाम्रो गौरबशाली पार्टी नेकपा (एमाले)मा रहेको जानकारी गराउदछु। यसबाट कोहि भ्रमित नहुन पनि आग्रह गर्नचाहन्छु। साथै, नेकपा (एमाले)का सम्पुर्ण नेता, कार्यकर्ता तथा सुभचिन्तकहरु लाई कोहि कसैको लहिलहिमा नलागी नेपाली जनताको प्यारो पार्टी नेकपा (एमाले)मा लामबद्द हुन हार्दिक अनुरोध गर्द्छु। 

पार्टी भित्र रहेकोे केही असहमति र अन्तरसंघर्षलाई उचित ब्यबस्थापन गरि पार्टीलाई गतिशील बनाउनुको सट्टा पार्टीलाई कमजोर बनाउने आफ्नै पार्टीको नेतृत्वमा रहेको सरकारलाई बिस्थापित गरि ‘युगखाने संभावना भएका आदरणीय कमरेडहरु छाक खाने’ बाटोमा नलाग्न समेत सादर अनुरोध  गर्दछु ।’