नयाँ सरकार बनाउन कांग्रेसमा चहलपहल, जसपाले पनि साथ दिने सम्भावना

काठमाडाैं । राष्ट्रपतिले दलहरूलाई नयाँ सरकार बनाउन दिएको समयममा सरकार बनाउन नेपाली कांग्रेसले सम्पूर्ण रूपमा लाग्ने निर्णय गरेको छ।

नेकपा माओवादी केन्द्रले सभापति शेरबहादुर देउवाको नेतृत्वमा सरकार बनाउन समर्थन गरिसकेको र जसपाले पनि सहयोग गर्ने भन्दै कांग्रेसले नयाँ सरकार बनाउने निर्णय गरेको हो।

सभापति देउवाको निवास बुढानिलकण्ठमा आज बसेको बैठकले दुई वा दुईभन्दा बढी दल मिलेर नयाँ सरकार बनाउन पार्टी सम्पूर्ण रूपमा क्रियाशील रहने निर्णय गरेको स्राेतले बताएकाे छ ।

नेकपा एमालेभित्रका केही सांसदहरू र जसपाले साथ दिने भएकोले नयाँ सरकार बनाउन सकिने कांग्रेस पदाधिकारी बैठकको निश्कर्ष छ।

कांग्रेस पदाधिकारी बैठकअघि आज सभापति देउवाले प्रचण्ड र उपेन्द्र यादवसँग छलफल गरेका थिए। जसपाका अध्यक्ष महन्थ ठाकुर भने देउवाको नेतृत्वमा नयाँ सरकार बनाउने पक्षमा देखिएका छैनन्।