ओलीलाई दिएको अल्टिमेटम सकियो, सिंहदरवारमा नेपाल पक्षका सांसदहरुको बैठक बस्दै

काठमाडौं । नेपाल कम्युनिष्ट पार्टी (नेकपा) एमालेको माधवकुमार नेपाल पक्षले प्रधानमन्त्री एवं पार्टी अध्यक्ष केपी शर्मा ओलीलाई दिएको अल्टिमेटम सकिएको छ । 

हिजो (आइतबार) बसेको नेपाल पक्षीय सांसदको बैठकले पार्टी एकताका लागि ओलीलाई आज बिहान ९ बजे सम्मको अल्टिमेटम दिएको थियो ।

अल्टिमेटमा अध्यक्ष ओलीले गत फागुन २८ गते गरेको निर्णय फिर्ता र पार्टीलाई २०७५ जेठ २ कै अवस्थामा फर्काउने प्रतिबद्धता व्यक्त गर्नु पर्ने र नेपालपक्षका अन्य मागहरुलाई सम्बोधन गर्नुपर्ने थियो । तर यो समयमा ओलीबाट कुनै प्रतिबद्धता नआएपछि नेपाल पक्षले सांसदको बैठक बोलाएको छ ।

नेपाल पक्षका सांसदहरुले राजीनामाका विषयमा छलफल गर्न साढे ९ बजे  संघीय संसद सचिवालय सिंहदरबारमा बैठक बस्दै छ ।

आजको बैठकमा नेपाल पक्षका नेता झलनाथ खनाल पनि सहभागी हुने बताएका छन्। कोरोना संक्रमणबाट मुक्त भई अस्पतालबाट फर्किएका खनालले आजैबाट सक्रिय राजनीति उल्लेख गर्ने बताएका थिए।