ओलीले विश्वासको मत लिने अघिल्लो दिन जसपाकाे दौडधूप, शीर्ष नेताहरू छलफलमा

काठमाडाैं ।  सत्ता समिकरणमा महत्वपूर्ण मानिएको जनता समाजवादी पार्टीका नेताहरूको दौडधुप बढेको छ।

प्रधानमन्त्री केपी शर्मा ओली र नेपाली कांग्रेसका सभापति शेरबहादुर देउवासँग भेटवार्ता गरेपछि जनता समाजवादी पार्टीका शीर्ष नेताहरू छलफलमा जुटेका हुन्।

जसपाका शीर्ष नेताहरू संघीय परिषद अध्यक्ष बाबुराम भट्टराईको निवास टोखामा आन्तरिक रणनीति बनाउन छलफलमा जुटेकाे स्राेतले जानकारी दिएकाे छ।  

अध्यक्ष महन्थ ठाकुर र नेता राजेन्द्र महतोले आज प्रधानमन्त्री ओली र सभापति देउवालाई छुट्टाछुट्टै भेटवार्ता गरेका थिए। उक्त भेटमा उनीहरूले जसपा तटस्थ बस्ने बताएका थिए।

प्रधानमन्त्री ओलीले सोमबार प्रतिनिधि सभाबाट विश्वासको मत लिने बताइरहेका छन्। 

जसपामा अध्यक्ष भट्टराई र अर्का अध्यक्ष उपेन्द्र यादव प्रधानमन्त्री ओलीको विकल्प खोज्नुपर्नेमा छन् भने अध्यक्ष ठाकुर भने यसबारे तटस्थ बस्नुपर्नेमा छन्।