एक भारतीयसहित तीन कम्पनी कालोसूचीमा, बोलपत्रमा सहभागी हुन रोक

काठमाडौं । सार्वजनिक खरिद अनुगमन कार्यालयले तीन वटा कम्पनीलाई कालोसूचीमा राखेको छ ।

कार्यालयले मंगलबार सूचना जारी गर्दै तीन कम्पनीलाई फरक–फरक अवधिका लागि कालोसूचीमा राखिएको जानकारी दिएको हो । कालोसूचीमा राखिएको कम्पनीमा एक विदेशी कम्पनी पनि रहेको छ ।

कार्यालयका अनुसार स्पेक्स नेपाल प्रालिलाई एक वर्षका लागि कालोसूचीमा राखिएको छ । त्यस्तै जेडिएम आर बिल्डर्सलाई एक वर्ष ६ महिनाका लागि कालोसूचीमा राखिएको छ ।

भारतको हैदरावादस्थित एमरएस श्रुस्थी कनटेक प्रालिलाई भने तीन वर्षका लागि कालोसूचीमा राखिएको कार्यालयले जनाएको छ ।
कार्यालयले जारी गरेको सूचना गोरखापत्रमा समेत प्रकाशित भएको छ ।

कालोसूचीमा परेका यी कम्पनीले तोकिएको अवधिभर सार्वजनिक निकायबाट हुने कुनै पनि खरिद कारबाहीमा सहभागी हुन पाउने छैनन् ।