प्रहरीको शिक्षालयमा तालिम लिनेहरुमाथिको बिभेद कसले सुन्ला ?

सम्पादकज्यू

पंचायत, प्रजातन्त्र, गणतन्त्र जुन तन्त्र आए पनि प्रहरीका तल्लो तहका जवानमाथि हुने थिचोमिचो र अन्याय उस्तै छ । यस्तै थिचोमिचो हुने ठाउँ हो, काठमाडौं उपत्यका प्रहरी शिक्षालय महाराजगंज ।

प्रहरी सहायक निरीक्षक, प्रहरी जवान र प्रहरी कार्यालय सहयोगी पदको भर्ना तथा छनौट अन्तर्गतका विभिन्न परीक्षाहरु शिक्षालयबाट सञ्चालन हुँदै आइरहेका छन् । काठमाडौं उपत्यका प्रहरी कार्यालय र सो मातहतका विभिन्न प्रहरी इकाईहरूमा कार्यरत प्रहरी जनशक्तिलाई समयानुकूल प्रशिक्षण प्रदान गर्ने काम पनि शिक्षालयबाट हुने गरेको छ । शिक्षालयका समादेशक(एसपी) एसपी वीरेन्द्रबहादुर शाही छन् ।

शिक्षालयमा तालिम दिनका लागि प्रशिक्षक बोलाउने काम प्रहरी निरीक्षक भगवती तिमल्सिना र लेखापाल बरिष्ठ सई पुष्पा थापाले गर्ने गर्दछन् । लेखापाल थापा पूर्वआईजीपी दीपक थापाकै शक्ति लगाएर शिक्षालय पुगेकी हुन् । इन्स्पेक्टर तिमल्सिना पूर्व गृहमन्त्री रमेश लेखकको सिफारिसमा शिक्षालय पुगेकी हुन् ।

बर्तमान सरकार गठन हुनासाथ पक्राउ परेका लेखकलाई शिक्षालयमै राखिएको थियो । जहाँ तिमल्सिनाले उनलाई सबै सुविधा उपलब्ध गराएकी थिइन् । इन्स्पेक्टरको १ बर्षमा सरुवा हुने भए पनि तिमल्सिना २ बर्षदेखि शिक्षालयमा कार्यरत छिन् । उनी त्यहीँबाट डीएसपी बढुवा भएर जाने दाउमा छिन् । पूर्वगृहमन्त्री रमेश लेखक, प्रहरी प्रधान कार्यालयको कर्मचारी प्रशासनका एसपी निरन्जन भट्टदेखि उपत्यका प्रहरी कार्यालयका कर्मचारी प्रशासनका डीएसपी पाण्डे पनि आफ्ना भेगका भएकाले उनी आफू डीएसपी हुने कुरामा ढुक्क जस्तै छिन् ।

जेनजी बिद्रोहपछि गृहमन्त्री सुधन गुरुङ भए । तर प्रहरीमा जेनजीको जगमा बनेको सरकारको होइन, लेखकको सिफारिस चल्ने गरेको छ । उनकै बिश्वासपात्रका रुपमा चिनिनेहरु प्रहरी हेडक्वाटरदेखि उपत्यकासम्मका कर्मचारी प्रशासनमा छन् । र, शिक्षालयका तिमल्सिनाको सरुवा २ बर्षसम्म पनि हुँदैन । प्रहरीका महत्वपूर्ण ठाउँमा आफ्नै भेगका भएकाले तिमल्सिनाले शिक्षालयको समादेशक पनि उतैको ल्याएको दाबी गर्न पछि पर्दिनन् ।

शिक्षालयमा तालिम दिनका लागि पनि नाम एक जनाको हुन्छ, तालिम दिन अख्तियारमा कार्यरतदेखि हेडक्वाटरका हाकिमका भेगकै बोलाउने गरिन्छ । तालिम दिनेले जुनियरको १ हजार ५ सय र सिनियरको २ हजार ५ सय पारिश्रमिक पाउने गर्दछन् । शिक्षालयको लेखापालको काम लेखाको हिसाबकिताव मात्र हेर्ने हो । तालिम दिन पाउँदैन । तर, बरिष्ठ सई लेखापाल पुष्पा थापाले तालिम दिनेमा आफ्नो नाम पनि राखी १ हजार ५ सय पारिश्रमिक लिने गरेकी छन् । हप्ताको एकाध दिन तालिम दिनका लागि मात्र करोडको गाडीमा सरर शिक्षालय आउने उनी अरु दिन आउँदिनन् ।

लेखाको काम सबै सहायकले गर्ने गर्दछन् । शिक्षालयमा तालिम लिनेहरु इन्स्पेक्टर तिमल्सिनाको हैकम र अन्याय सहन गर्न नसकी कतिपय जवान र असई तालिम लिंदालिंदै भाग्न बाध्य बनाइएका छन् । तिमल्सिनाले आफ्नो भेगकालाई मात्र तालिममा सहयोग गरी अन्यत्रकालाई दुःख दिने र चरम भेदभाव गरेर तालिम छाडेर भाग्न बाध्य पार्ने गरेकी छन् ।

शिक्षालयका परीक्षा समेत पारदर्शी नहुने गरेकोबारेमा प्रहरी प्रधान कार्यालयले अनुगमन गर्नु जरुरी छ । तालिमेहरुको पैसा र रासनमा समेत अनियमितता हुने गरेको छ । पूर्वप्रधानमन्त्री शेरबहादुर देउवाको दबाबमा हाइट नै नपुगे पनि प्रहरीमा भर्ना भएकी हुन् उनी । अहिले पनि उनको हाइट नाप्ने हो भने प्रहरीको मापदण्ड अनुसार छैन । तर तिनैले तालिम लिनेहरुलाई फिजिकल परीक्षामा फेल गराउने गरेकी छन् ।

लोकसेवा आयोगबाट परीक्षा लिन आउनेहरुलाई समेत गुमराहमा राख्ने, सीसीटीभी बिग्रेको, वाइफाईको समस्या देखाउने गरिएको छ । प्रहरीमा भर्नादेखि तालिम दिने शिक्षालयमा भइरहेका यस्ता बिभेदका बारेमा प्रहरी महानिरीक्षकको सचिवालयमा गुनासो पनि पुगिसकेका छन् । तर तालिमेहरुमाथि बिभेद कम भएको छैन ।

–  शिक्षालयका अन्यायमा परेका तालिमे प्रहरीहरु