चोरी रोक्न खोज्दा महोत्तरीको सोनमामा दम्पत्तिमाथि गोली प्रहार

महोत्तरी । महोत्तरीको सोनमा गाउँपालिकामा गोली चलेको छ । चोरी गर्न घरभित्र प्रवेश गरेका लुटेरा समूहको प्रतिवाद गर्दा एक दम्पत्तिमाथि गोली प्रहार भएको छ । घटनामा पतिपत्नी दुवै जना घाइते भएका छन् ।

मंगलबार राति सोनमा गाउँपालिका–३ खखना दक्षिणबारी टोलमा ५–६ जनाको समूहमा आएका लुटेराहरूले स्थानीय २७ वर्षीय रामईश्वर यादवको घरमा प्रवेश गरी चोरी गर्ने प्रयास गरेका थिए ।

घरभित्र अपरिचित व्यक्तिहरू देखेपछि रामईश्वर यादव र उनकी २२ वर्षीया श्रीमती किरण यादवले प्रतिवाद गरेका थिए ।

प्रहरीका अनुसार प्रतिवादका क्रममा लुटेरा समूहले दम्पत्तिमाथि गोली प्रहार गरेको हो। गोली लागेर गम्भीर घाइते भएका दुवै जनालाई तत्काल उद्धार गरी स्थानीय स्तरमा प्रारम्भिक उपचार गरिएको थियो ।

पछि थप उपचारका लागि उनीहरूलाई जनकपुरस्थित अस्पताल पठाइएको प्रहरीले जनाएको छ ।

घटनापछि पुगेको प्रहरी टोलीले घटनास्थलको निरीक्षण तथा खानतलासी गर्दा एक थान गोलीको खोका बरामद गरेको छ। घटनामा संलग्न व्यक्तिहरूको पहिचान भने अझै खुल्न सकेको छैन ।

जिल्ला प्रहरी कार्यालय महोत्तरीले फरार लुटेराहरूको खोजी कार्य तीव्र पारिएको जनाएको छ ।