संसदमा सरकारको सशक्त विरोध गर्ने विपक्षीहरुको निर्णय

काठमाडौं । विपक्षी दलहरुले सरकारको गलत कार्यशैलीविरुद्ध संसद्मा सशक्त विरोध गर्ने निर्णय गरेका छन् । आज आइतबार बसेको नेपाली कांग्रेस, नेकपा (एमाले), नेकपा र राप्रपाका प्रमुख सचेतकहरूको बैठकले प्रतिनिधिसभा थप सशक्त बन्ने निर्णय गरेका हुन् ।

अब जेठ १२ गते बस्ने प्रतिनिधि सभा बैठकमा सरकारको सशक्त प्रतिरोध गर्ने निर्णय भएको एमाले प्रमुख सचेतक ऐनबहादुर महरले जानकारी दिए ।

बैठकमा कांग्रेसकी बासना थापा, एमालेका ऐन महर, नेकपाका युवराज दुलाल र राप्रपाकी प्रमुख सचेतक खुश्बु ओली सहभागी थिए । छलफलमा प्रधानमन्त्री बालेन शाहले संसद्लाई गरेको उपेक्षा, विपक्षीको विरोधलगायत विषयमा छलफल भएको थियो ।

एमाले प्रमुख सचेतक महरले संसदीय मूल्यमान्यता विपरीत विपक्षीहरूको आवाजलाई दबाएर, पेलेर अगाडि बढ्ने सरकारको दुस्साहस, गैर लोकतान्त्रिक चरित्र र सभामुखको दलीय भूमिकाका बारेमा ‘गम्भीर’ छलफल भएको बताए ।

संविधानको कार्यान्वयन, प्रतिनिधिसभा नियमावलीको पालना र लोकतन्त्रको रक्षाका निम्ति विपक्षीबिचको छलफल र सहकार्यलाई आउँदा दिनमा पनि निरन्तरता दिनेबारे सहमति भएको महरको भनाइ छ ।

प्रधानमन्त्री बालेनलाई संसद्मा उपस्थित भएर सांसदहरूका प्रश्नको जवाफ दिनुपर्ने भन्दै विपक्षीले निरन्तर विरोध गर्दै आएका छन् ।