तालिमका क्रममा बेहोस भएका ६ सशस्त्र प्रहरी जवानलाई काठमाडौँ ल्याइँदै

काठमाडौँ। कैलालीको टीकापुरस्थित सशस्त्र प्रहरी बल नेपाल राजस्व भन्सार तथा औद्योगिक तालिम शिक्षालयमा आज (शुक्रबार) बिहान तालिम गर्दागर्दै बेहोस भएका ७ जवानमध्ये ६ जनालाई उपचारका लागि काठमाडौँ ल्याइँदै छ।

सशस्त्र प्रहरीका सहप्रवक्ता डीएसपी शैलेन्द्र थापाका अनुसार सशस्त्र प्रहरी जवान आधारभूत तालिमका प्रशिक्षार्थी तालिमका क्रममा बेहोस भएका ६ जनालाई थप उपचारका लागि आज दिउँसो १स्४५ बजे नेपाली सेनाको स्काई ट्रकमार्फत काठमाडौँ पठाइएको हो।

यसअघि उनीहरूलाई उपचारका लागि हेलिकप्टरमार्फत सुर्खेत लगिएको थियो। त्यहाँ उपचार सम्भव नभएपछि काठमाडौँ पठाइएको हो।

आज बिहान टीकापुरमा तालिमका क्रममा सशस्त्र प्रहरीका ७ जना बेहोस भएका थिए।

अर्का १ जनाको अवस्था भने सामान्य रहेको डीएसपी थापाले बताए।