आफूविरुद्ध नियोजित रुपमा भ्रामक प्रचार भएको भन्दै सांसद जगदीश खरेलको असन्तुष्टि

काठमाडौँ । राष्ट्रिय स्वतन्त्र पार्टी (रास्वपा) का सांसद जगदीश खरेलले आफूविरुद्ध नियोजित र भ्रामक प्रचार गरिएको भन्दै आपत्ति जनाएका छन् ।

सामाजिक सञ्जालमार्फत धारणा सार्वजनिक गर्दै पूर्वसञ्चारमन्त्रीसमेत रहेका खरेलले आफूले कुनै गैरकानुनी काम नगरेको दाबी गरेका छन् । उनले सत्यतथ्यका आधारमा आफूलाई जाँच्न आग्रह गर्दै आफूलाई कुनै डर नभएको उल्लेख गरेका छन् ।

सञ्चारमन्त्रीका रूपमा कार्यरत रहँदा स्मार्ट टेलिकमसँग सम्बन्धित आर्थिक अनियमिततामा संलग्न रहेको आशयका समाचार सार्वजनिक भएपछि उनले त्यसप्रति प्रतिक्रिया दिएका हुन् । खरेलले आफूले कुनै रकम हिनामिना नगरेको जिकिर गर्दै भ्रममा नपर्न आफ्ना समर्थक तथा शुभेच्छुकलाई आग्रह गरेका छन् ।

उनले आफ्नो इमानदारीमाथि प्रश्न उठाउने उद्देश्यले योजनाबद्ध रूपमा राजनीतिक तथा व्यक्तिगत चरित्रमाथि प्रहार गरिएको आरोप पनि लगाएका छन् । साथै, यस विषयमा कानुनी उपचारको बाटो अपनाउने संकेत उनले दिएका छन् ।

सुशीला कार्की नेतृत्वको मन्त्रिपरिषद्मा सञ्चारमन्त्रीको जिम्मेवारी सम्हालेका खरेल हाल ललितपुर(२ बाट निर्वाचित प्रतिनिधिसभा सदस्य हुन् ।