थुनामा रहेका बिचौलिया भट्ट र गृहमन्त्री सुधन गुरुङ ब्यापारीक साझेदार : प्रधानमन्त्री वालेन्द्रले पदमुक्त गर्लान् ?

काठमाडौं । राष्ट्रिय स्वतन्त्र पार्टीका एक मन्त्री १३ दिनमै विवाद परेपछि पदमुक्त भएका थिए । अर्का मन्त्री पनि एक महिना नपुग्दै विवादमा परेका छन् ।

सम्पत्ति शुद्धीकरणको अनुसन्धानका क्रममा थुनामा रहेका दीपक भट्टको एक कम्पनीमा ब्यवसायिक साझेदार रहेको खुलेपछि गृहमन्त्री सुधन गुरुङ पनि चरम विवादमा परेका छन् ।

सम्पत्ति शुद्धीकरणमा दीपक भट्ट, सुलभ अग्रवाल र साहिल अग्रवालको छानबिन गर्ने क्रममा हिमालयन रिइन्स्योरेन्ससहित लघुवीमा कम्पनीसमेत अनुसन्धानको दायरामा आएका छन् । त्यही सिलसिलामा स्टार माइक्रो इन्स्योरेन्स कम्पनी लिमिटेडमा भट्ट र मन्त्री गुरुङको साझेदारी रहेको खुलासा भएको हो ।

दर्ता नम्बर ३०४६७०–७९–८० रहेको छ भने संचालक लगतको तेस्रो नम्बरमा दीपक भट्टको कम्पनी इन्फिनिटी होल्डिङ्गसकी प्रतिनिधि कर्मचारी श्रीमती प्रजुनी बज्राचार्यको नाम छ भने साझेदारीको ४९ नम्बरमा गोर्खा चुमनुब्री–२ का दिलबहादुर गुरुङका छोरा सुधन गुरुङको नाम छ ।

सुधनको नागरिकता नम्बर ११३७९ राखिएको छ भने उनका नाममा २५ हजार कित्ता शेयर जारी भएको लगतमा देखिन्छ । सुधनले बुझाएको सम्पत्ति विवरणमा यो वीमा कम्पनीको सेयर उल्लेख गरिएको छैन ।

यस्ता विवादास्पद मन्त्री गुरुङलाई रास्वपा सभापति रवि लामिछाने र प्रधानमन्त्री वालेन्द्र शाहले पदमुक्त गर्लान् कि नगर्लान् भन्ने जिज्ञासा सामाजिक संजालमा प्रकट भइरहेको छ ।