पाकिस्तानको मध्यस्थतामा युद्धविराम, इरानी जनताले मनाए उत्सव

एजेनसी । अमेरिका, इजरायल र इरानबीच जारी युद्ध २ साताका लागि रोकिएको छ । दुई हप्ताको युद्धविरामको घोषणासँगै इरानीहरूले उत्सव मनाएका छन् । इरानी जनताहरुले तेहरानको सडकमा उत्रिएर उत्सव मनाएका हुन् ।

अमेरिकाले युद्धविराम घोषणा गरेपछि कुवेत, बहराइन, साउदी अरेबिया र संयुक्त अरब इमिरेट्स लगायतका खाडी देशले हवाई प्रतिरक्षा प्रणाली सक्रिय पारेका छन् ।

कुवेतको सेनाले क्षेप्यास्त्र र ड्रोन आक्रमण रोकिरहेको बताएको छ भने बहराइनले साइरन बजाएर जनतालाई सुरक्षित रहन आग्रह गरेको छ । साउदी र कतारले पनि सुरक्षा सतर्कता उच्च पारेका छन् ।

अमेरिकी राष्ट्रपति डोनाल्ड ट्रम्पले इरानलाई जलमार्ग खोल्न दिएको समयसीमा सकिनु केही समयअघि मात्र यो सहमति भएको हो । यसअघि उनले ‘सम्पूर्ण सभ्यता मर्नेछ’ भन्ने धम्की दिएका थिए ।

पाकिस्तानको मध्यस्थतामा अमेरिका युद्धबिराम गर्न तयार भएको बताइएको छ । इरानका अनुसार दुई देशबीच शुक्रबार पाकिस्तानको इस्लामाबादमा वार्ता सुरु हुनेछ । ट्रम्पले इरानले १० बुँदे प्रस्ताव पेस गरेको र दुई हप्ताभित्र अन्तिम सम्झौता हुने अपेक्षा गरेका छन् ।