घन्टीमा भोट हाल्ने नेताहरूलाई कारबाही गर्न खोजी गर्दै नेकपा 

काठमाडौं । नेपाली कम्युनिस्ट पार्टीले फागुन २१ को प्रतिनिधि सभा निर्वाचनमा रास्वपा उम्मेदवारलाई भोट हाल्ने पार्टीका नेताहरूलाई कारबाही गर्ने भएको छ । क-कसले रास्वपालाई भोट हालेका हुन् ती नेता पत्ता लगाएर कारबाही गर्ने चेतावनी नेकपाले दिएको हो ।

बिहीबार पार्टी कार्यालय पेरिसडाँडामा सम्बोधन गर्दै पार्टी सैयोजक पुष्पकमल दाहाल प्रचण्डले केन्द्रीय सदस्यहरुले नै आफ्नो पार्टीका उम्मेदवारलाई भोट नहालेको रिपोर्ट आएको बताएका थिए ।

बैठकमा प्रचण्डले ५० प्रतिशत भोट रास्वपाको चुनाव चिह्न घन्टीमा गएको रिपोर्ट आएको जानकारी गराउँदै भने, ‘फिप्टी पर्सेन्ट घण्टीमा गए भन्ने जनरल रिपोर्ट आएको छ । कोकोले भोट हालेनन् केन्द्रीय सदस्यमध्ये, प्रदेश सदस्य, तपाईंहरुको जनवर्गीय संगठनका नेताहरु को क्षेत्रमा गएनन्, कले भोट हालेनन्, कले घण्टीमा हाले, त्यो रिपोर्ट तपाईंहरुले दिनैपर्‍यो हामीलाई । तिनलाई कारबाही गर्नैपर्छ ।’

आफ्नो पार्टीलाई भोट नदिएर रास्वपालाई भोट हाल्नेहरुमाथिको कारबाहीको सुरुवात केन्द्रीय सदस्यबाटै हुने प्रचण्डको भनाइ रहेको छ ।