साइबर ब्यूरोको आग्रह, ह्वाट्सएप ह्याक गरी पैसा माग्नेहरूसँग जोगिन यी उपाय अपनाउनुस्

काठमाडौं । नेपाल प्रहरीको साइबर ब्यूरोले ह्वाट्सएप ह्याक गरेर पैसा माग्ने क्रम बढेकाले त्यस्तो ठगीबाट जोगिन आग्रह गरेको छ ।

ब्यूरोले बिहीबार एक सूचना जारी गरी हाल नेपालमा ह्वाट्सएप ह्याक गरेर “म समस्या र अप्ठ्यारोमा परेको छु, तुरुन्त पैसा पठाइदिनुहोस्” वा “मेरो बैंकिङ एपमा समस्या आएर मैले पैसा पठाउन सकिरहेको छैन, तपाई यस क्यूआरमा पैसा पठाइदिनुहोस् भन्ने प्रकारका मेसेज नजिकका साथीभाइ लगायत आफन्तहरूलाई पठाई ठगी गर्ने घटनाहरू बढिरहेको जनाएको छ ।

यस्ता ठगीबाट जोगिनका लागि त्यस्ता मेसेजहरूमा तुरुन्त विश्वास नगर्न र सम्भव भएसम्म सो व्यक्तिलाई प्रत्यक्ष फोन गरेर पुष्टि गर्न अनुरोध गरेको छ ।

त्यसैगरी,शंकास्पद लिंक, कोड वा फाइल क्लिक र डाउनलोड नगर्न, टु स्टेप भेरिफिकेसन अनिवार्य रूपमा प्रयोग गर्न, आफ्नो ओटीपी भेरिफिकेसन कोड कसैलाई पनि नदिन, आफ्नो मोबाइल र एप्स नियमित रूपमा अपडेट गर्न ह्वाट्सएप वेव प्रयोग गरेपछि लगआउट गर्न पनि आग्रह गरेको छ ।