अनुशासन उल्लंघन गर्ने सांसदलाई फिर्ता बोलाउने रवि लामिछानेको चेतावनी

काठमाडौँ । रवि लामिछानेले पार्टीका सांसदहरूलाई अनुशासन उल्लंघन भए फिर्ता बोलाउने संकेत गरेका छन्। उक्त चेतावनी उनले पार्टीका सांसदका लागि आयोजित अभिमुखीकरण कार्यक्रममा समापन मन्तव्य दिँदै व्यक्त गरेका हुन्।

सभापति लामिछानेले सांसदहरूले अनुशासन पालना गर्नुपर्नेमा जोड दिँदै पार्टी ठूलो भएको र सरकार सञ्चालनमा रहेको अवस्थामा प्रत्येक सांसदले जिम्मेवारीसाथ व्यवहार गर्नु आवश्यक भएको बताए।

राष्ट्रिय स्वतन्त्र पार्टीको विधानको दफा ६९ अनुसार जनप्रतिनिधिलाई फिर्ता बोलाउने अधिकार व्यवस्था गरिएको छ।

उनले सांसदहरूको व्यक्तिगत स्वतन्त्रता सम्माननीय रहने तर पार्टी अनुशासन कायम रहनै पर्ने स्पष्ट पारे। स्वतन्त्रता र अनुशासनबीचको सन्तुलन भंग नगर्नुपर्नेमा पनि उनले जोड दिएका छन्।

लामिछानेले आगामी दिनमा पार्टीभित्र अनुशासन कडाइका साथ लागू गरिने र सांसदहरूले यसका मापदण्ड पालना गर्नुपर्ने जानकारी गराएका छन्।