निर्वाचन आचारसंहिता उल्लंघनसम्बन्धी अभियोगमा ३२ जना प्रहरी नियन्त्रणमा

काठमाडौँ । निर्वाचनसम्बन्धी गतिविधिको अनुगमन तथा नियन्त्रणका लागि स्थापना गरिएको नेपाल प्रहरी अन्तर्गतको केन्द्रीय निर्वाचन संयन्त्रले विभिन्न अभियोगमा ३२ जनालाई नियन्त्रणमा लिएको जनाएको छ।

प्रहरी प्रधान कार्यालयमा क्रियाशील उक्त संयन्त्रले सामाजिक सञ्जालमार्फत आधारहीन सूचना प्रसारण, मतदाता भ्रमित पार्ने गतिविधि, निर्वाचन प्रक्रियामा अवरोध पुर्‍याउने कार्य तथा आचारसंहिता विपरीतका क्रियाकलापमा संलग्नता देखिएको आरोपमा ती व्यक्तिहरूलाई नियन्त्रणमा लिएको स्पष्ट गरेको छ।

निर्वाचनसम्बन्धी साइबर निगरानीलाई प्रभावकारी बनाउन केन्द्रीय संयन्त्रअन्तर्गत प्रदेशगत साइबर इकाइहरू परिचालन गरिएको छ। सोही संरचनामार्फत सातै प्रदेशमा निगरानी र अनुसन्धान तीव्र पारिएको जनाइएको छ।

प्रहरीका केन्द्रीय प्रवक्ता तथा डिआइजी अबि नारायण काफ्ले का अनुसार प्रदेशगत विवरणअनुसार मधेश प्रदेशबाट ४ जना, बागमती प्रदेशबाट ४ जना, गण्डकी प्रदेशबाट १ जना, लुम्बिनी प्रदेशबाट ४ जना, कर्णाली प्रदेशबाट २ जना र सुदूरपश्चिम प्रदेशबाट १ जना पक्राउ परेका छन्। काठमाडौँ उपत्यकाबाट १६ जना नियन्त्रणमा लिइएको छ भने कोशी प्रदेशबाट भने हालसम्म कसैलाई पनि पक्राउ गरिएको छैन।

नियन्त्रणमा लिइएका व्यक्तिमध्ये १७ जनालाई आवश्यक सोधपुछपछि रिहा गरिएको छ। बाँकी १५ जनामाथि भने प्रचलित कानुनी व्यवस्था बमोजिम थप अनुसन्धान प्रक्रिया अघि बढाइएको प्रहरीले जनाएको छ।