ओलीको छिर्के दाउः महन्थ ठाकुरलाई प्रधानमन्त्रीको प्रस्ताव

काठमाडौं । नेपाली कांग्रेसभित्र बरिष्ठ नेता रामचन्द्र पौडेल, केन्द्रीय सदसय कृष्णप्रसाद सिटौला, महामन्त्री सशांक कोइरालासहितका सभापति शेरबहादुर देउवालाई सर्वसम्मत प्रधानमन्त्री हुनका लागि अनुरोध गरेपछि प्रधानमन्त्री केपी ओलीले महन्थ ठाकुरलाई प्रधानमन्त्री पदको अस्त्र प्रयोग गरेका छन् । नेकपा माओवादीका अध्यक्ष पुष्पकमल दाहाल ‘प्रचण्ड’ले ओलीलाई हटाउन महन्थ ठाकुरलाई नै प्रधानमन्त्री पदको प्रस्ताव गरेको थाहा पाएपछि ओलीले पनि यो अस्त्र प्रयोग गरेका छन् ।

प्रचण्ड र ओली दुवैतिरबाट प्रस्ताव आएपछि जनता समाजवादी पार्टीले अध्यक्ष ठाकुरलाई प्रधानमन्त्रीमा प्रस्ताव गर्न आन्तरिक छलफल सुरु गरेको छ । शुक्रबार बसेको जसपाको संयुक्त संसदीय दलको बैठकमा सांसदहरुले सरकारको नेतृत्व गर्ने मौकालाई सदुपयोग गर्न सुझाव दिएका थिए ।

जसपालाई सरकारको नेतृत्व गर्ने अवसर आएमा जसपाले ठाकुरलाई अघि सार्ने सो पार्टीका नेताहरुले बताउने गरेका छन् । 

शुक्रबार बसेको संसदीय दल बैठकको अध्यक्षता पनि ठाकुरले नै गरेका थिए । ठाकुरलाई अध्यक्षमा प्रस्ताव गरे पनि जसपाले अझै संसदीय दलको नेता चयन गर्नसकेको छैन ।

दलको नेता चयन नभएसम्म ठाकुरले अध्यक्षता गर्ने सहमति जसपाले गरेको छ । जसपाका नेता केशव झाले जसपाले सरकारको नेतृत्व गर्ने अवसरको सदुपयोग गर्नुपर्छ, ब्यक्तिको कुरा अहिले तय भइसकेको छैन ।