एमाले छाडेका पूर्वआईजीपी खनाल बालेन साहको समूहतिर नजिकिंदै

काठमाडौं । नेपाल प्रहरीका पूर्वआइजीपी सर्वेन्द्र खनालले एमाले परित्याग गरेका छन् । उनले सामाजिक संजाल फेसबुकमा आफू कुनै पनि पार्टीमा नरही स्वतन्त्र रुपमा अध्ययन अनुसन्धानमा लाग्ने उल्लेख गरेका छन् । केपी ओलीलाई महान् राष्ट्रवादी र अडान भएको नेता भन्दै एमालेमा प्रवेश गरेका खनालको २ बर्षमै सो पार्टीसँग मोहभंग हुन पुगेको छ ।

एमालेमा प्रवेश गरी काठमाडौं ६ र तनहुँ १ मा प्रतिनिधिसभा चुनावमा उम्मेदवार भएका खनालले २ बर्षमै पार्टी छाड्नुको कारण भने खुलाएका छैनन् । एमालेमा बीसौं बर्ष दुःख गरेका नेता–कार्यकर्ताहरुले अवसर नपाएका बेला उनलाई पार्टीले २ ठाउँबाट चुनावमा टिकट दिए पनि पार्टी छाडेका छन् ।

दुर्गा प्रसाईलाई ल्याउनासाथ केन्द्रीय सदस्य बनाउने र खनाललाई प्रवेश गर्नासाथ संसदमै टिकट दिएका ओलीले बिचौलिया ब्यापारी मोति दुगडलाई राज्यमन्त्री नै बनाएर पुरस्कृत गरेका थिए ।

एमाले छाडेका पूर्वआईजीपी खनाल भने काठमाडौ महानगरपालिकाका मेयर बालेन्द्र साहको समूहको सम्पर्कमा रहेका थिए । बालेन साहका सल्लाहकार कुमार बेनसँग पटक पटक सम्पर्क गरेपछि उनी एमाले छाड्ने निष्कर्षमा पुगेको बताइन्छ ।

बालेन साहले आगामी स्थानीय तहको निर्वाचनअघि नै वा त्यसपछि पार्टी खोल्ने र उक्त पार्टीमा लागेर सांसद हुने दाउमा खनालले एमाले छाडेको उनीसँग निकट एक पूर्व प्रहरी अधिकारीले बताए । ती अधिकारीका अनुसार खनाल केही समयदेखि नै बालेन साहको सम्पर्कमा थिए । कुमार बेनसँग सम्पर्क गरिरहेका उनलाई उताबाट हरियो बत्ती देखाएपछि एमाले छाड्ने निष्कर्षमा पुगेका हुन् ।

बालेन साहले आगामी २०८४ को निर्वाचनमा पार्टी खोल्ने भएकाले उनको पार्टीबाट सांसद हुने महत्वाकांक्षा काठमाडांै महानगर प्रहरीका एसएसपी राजु पाण्डेलाई पनि पलाएको छ । पूर्वआईजीपी खनालमाथि ‘सांसद अपहरण’ को आरोप लाग्दैआएकाले बालेन साहको अभियानमा उनलाई सहजै स्वीकार गर्न निकै सकस रहेको बताइन्छ ।