प्रचण्डलाई गोकुल बाँस्कोटाको कटाक्ष, अब चुनाव रोक्ने वा २–३ सीटका लागि वाम अंकमाल गर्ने ?

काठमाडौं । नेकपा (एमाले)का नेता गोकुल बाँस्कोटाले नेपाली कम्युनिष्ट पार्टी(नेकपा)का संयोजक पुष्पकमल दाहाल ‘प्रचण्ड’ले विगतमा समयले दिएका दुर्लभ नेतृत्वदायी ऐतिहासिक अवसररु पटक पटक गुमाएको र अब पश्चाताप गर्ने अवस्थामा रहेको बताएका छन् ।

प्रचण्डले आइतबार एक कार्यक्रममा ‘खलनायक बनेर इतिहासको पानामा हराउन नचाहेको, नायकका रूपमा इतिहास लेखाउन विश्राम नलिने’ बताएका थिए । त्यही अभिब्यक्तिलाई पश्चातापको संज्ञा दिंदै नेता बाँस्कोटाले प्रचण्डले समयले उनलाई ऐतिहासिक अवसर दिए पनि त्यो पूरा नगरेकोले अब पश्चाताप गर्ने समयमात्र रहेको उल्लेख गरेका हुन् ।

नेता बाँस्कोटाले सामाजिक संजालमा लेखेका छन्–‘अब प्रचण्डसँग चुनाव रोक्ने वा २–४ सिटका लागि वाम अंकमाल गर्ने प्रयत्न मात्र रहेको छ ।’

उनी लेख्छन्– ‘समयले विश्वासपूर्ण जवाफदेहितासहित उपलब्ध गराएका दुर्लभ नेतृत्वदायी ऐतिहासिक अवसरहरु पटक–पटक गुमाएपछि पश्चातापको समयमात्र रहन्छ । कमरेड प्रचण्डको पछिल्लो भावुक याचना त्यही हो । अब लाष्ट विकल्प चुनाव रोक्नु वा अन्तिम पल्ट आफ्नै दुईचारका लागि मात्र भए पनि आकस्मिक वाम अंकमाल प्रयत्न ।’