ओलीलक्षित गोकुलको कटाक्ष : ०६१ मा तुलसी गिरी बन्न खोज्ने ‘पावर हंगरले अरुको निष्ठामाथि प्रहार गर्ने ?

काठमाडौैं । एमाले नेता गोकुल बाँस्कोटाले २०६१ मा तत्कालीन राजा ज्ञानेन्द्र शाहले कू गरेपछि तुलसी गिरी बन्न च्यानल खोज्दै हिंड्ने ‘पावर हंगर’ ले अरुको क्रान्तिकारी निष्ठामाथि हमला नगरेकै राम्रो भन्दै सामाजिक संजालमा टिप्पणी गरेका छन् ।

नेता बाँस्कोटाले पावर हंगर भनेर एमालेका अध्यक्ष केपी शर्मा ओलीतिर प्रहार गरेको सहजै बुझ्न सकिन्छ । बाँस्कोटाले लेखेको टिप्पणीमा चुनाव हुनुपर्ने आसय भएकाले पनि निर्वाचनको बिरोध गर्दैआएकाले उक्त टिप्पणी ओलीलक्षित नै भएको सहजै बुझ्न सकिन्छ ।

बाँस्कोटाले आइतबार बिहानै सामाजिक संजालमा लेखेको टिप्पणीमका ओली तुलसी गिरी बन्न तयार रहेको उल्लेख गरेका छन् । चुनावको बिरोध गर्दै प्रतिनिधिसभाको पुनस्र्थापनामा जोड दिइरहेका ओलीले पार्टीभित्र अध्यक्षको प्रतिस्पर्धामा रहेर पराजीत भएका ईश्वर पोखरेलपक्षका नेताहरुबिरुद्ध एकपछि अर्को प्रहार गर्न थालेपछि बाँस्कोटाले उनलाई ०६१ मा तुलसी गिरी बन्न तयार हुने पावर हंगरले अरुको क्रान्तिकारी निष्ठामाथि प्रहार नगर्न चेतावजी दिएका छन् ।

बाँस्कोटा सामाजिक संजालमा लेख्छन्– ‘०६१ मा राजा ज्ञानेन्द्रले कू गरेपछि तुलसी गिरी बन्न च्यानल खोज्दै हिंड्ने पावर हङ्गरले अरुको क्रान्तिकारी निष्ठामाथि हमला नगरेकै राम्रो, तथ्यलाई रफ्फुले छेक्न सक्दैन । अहिले पनि पावर प्राप्ती हुन्छ भने राजा आउँदा प्रतिगमन पूरै सच्चिएको तिलस्मी कथा लेख्न तिनीहरु तयार छन् । तसर्थ, ईलेक्सन ।’

बाँस्कोटा ओलीसँग लामो समयदेखि निकट रहेर काम गरेका नेता हुन् । ०६१ मा गणतन्त्रको माग हुँदा ओली संवैधानिक राजतन्त्रकै वकालत गर्दैआएका थिए । उनले बयलगाडा चढेर अमेरिका पुगिंदैन भन्दै गरेको भाषण अहिलेसम्म चर्चित छ । बाँस्कोटाले नाम उल्लेख नगरी लेखे पनि उनले ओलीतिरै निशाना साँधेको सहजै बुझ्न सकिन्छ । ओलीले देश गणतन्त्रमय भइसक्दा पनि संवैधानिक राजतन्त्रको वकालत गरेका थिए ।