जाँचबुझ आयोगले लियो आईजीपी कार्कीसँग बयान, ओली र लेखकलाई पनि बयानमा बोलाउने तयारी

काठमाडौं । भदौ २३ र २४ गतेको घटनासम्बन्धी जाँचबुझ आयोगले प्रहरी महानिरीक्षक दानबहादुर कार्कीलाई बयान लिएको छ । महानिरीक्षक कार्कीलाई सोमबार आयोगले सिंहदरबारस्थित आफ्नो कार्यालयमा उपस्थित गराएर बयान लिएको हो ।

भदौ २३ गतेको जेनजी आन्दोलनकै दिन तत्कालीन केपी ओली सरकारले उनालई उपत्यका प्रहरी कार्यालयमा सरुवा गरेको थिया । २४ गते उनी उपत्यकाको कमाण्ड सम्हालिसकेपछि आन्दोलनका नाममा विध्वंस भएको थियो । यतिसम्म कि उनले ठूलो संख्यामा प्रहरी हुँदाहुँदै पनि उपत्यका प्रहरी कार्यालय रानीपोखरीको भवनसमेत जोगाउन सकेनन् । त्यहाँ भएका थुप्रै हतियार लुटिएका थिए ।

महाराजगंज बृत्तमा प्रहरी भवन आगो लागेर भित्रै जल्ने भएपछि हेलिकोप्टरमार्फत् उद्दार गरिदिन आग्रह गर्ने परिस्थितिमा पनि उनीहरुलाई बचाउने प्रयत्न गरिएको थिएन । सेनाको हेलिकोप्टरबाट उनीहरुलाई बल्लतल्ल बचाइएको थियो ।

भदौ २४ गतेको बिध्वंशका दिन उपत्यकाको कमाण्ड सम्हालेर काठमाडौंसहित तीनै जिल्लाका प्रहरी चौकी जोगाउन नसकेका कार्की कात्तिक २४ गते आइजीपी नियुक्त भएका थिए । कार्कीसँग आयोगले भदौ २३ गते एकै दिन ७६ जना युवाको हत्या हुनुका पछाडि प्रहरीको भूमिका, भदौ २४ गतेको विध्वंस नियन्त्रण हुन नसक्नुको कारणबारे सोधपुछ गरेको छ ।

आयोगका प्रवक्ता विज्ञान शर्माले कार्कीको बयान अझै बाँकी रहेकाले मंगलबार पनि जारी रहने सार्वजनिक प्रतिक्रिया दिएका छन् । आयोगले यसअघि तत्कालीन आइजिपी चन्द्रकुबेर खापुङसँग बयान लिइसकेको छ ।

त्यसैगरी, आयोगले यसअघि तत्कालीन गृहसचिव गोकर्णमणि दुवाडीसँग बयान लिइसकेको छ । भदौ २३ र २४ गतेको घटना हुँदा प्रधानमन्त्री रहेका केपी शर्मा ओली र गृहमन्त्री रमेश लेखकलाई पनि आयोगले बयानका लागि बोलाउने तयारी गरेको छ । आयोगले ओली र लेखकलाई उपत्यका नछाड्नेगरी स्थानहद गरेको छ ।