माओवादी र नेकपा एसबीच एकीकरण हुने लगभग निश्चित, यस्तो छ सहमति

काठमाडौँ । कम्युनिस्ट घटकहरुबीच एकताको प्रयास चलिरहेका बेला नेकपा माओवादी केन्द्र र नेकपा एकीकृत समाजवादीबीच पार्टी एकीकरण हुने लगभग निश्चित भएको छ । यो एकतामा नेत्रविक्रम चन्द ‘विप्लव’ नेतृत्वको नेकपालाई पनि समेट्ने प्रयास जारी छ ।

एकता वार्तामा सहभागी नेताहरूका अनुसार माओवादी केन्द्र र नेकपा एसबीच अब पार्टी एकीकरणमा कुनै विमति छैन । नेतृत्वको विषयमा टुंगो लगाउन माओवादी संयोजक ‘प्रचण्ड’ र नेकपा एसका अध्यक्ष माधवकुमार नेपाललाई जिम्मा दिइएको वार्ता टोलीका एक सदस्यले बताएका छन् ।

निर्वाचन आयोगले दल दर्ताका लागि दिएको समयअघि नै दुई पार्टीबीच एकीकरण भइसक्ने बताइएको छ । पार्टीको चुनाव चिन्हबारे भने सहमति भइसकेको छैन । नेकपा एसले कलम नै राखौँ भनिरहेको छ भने माओवादीले अर्को खोजौँ भन्दै छ । यसबारेमा पनि ठुलो विमति भने नहुने नेताहरू बताउँछन् ।

स्रोतका अनुसार पार्टी एकीकरणका लागि सिद्धान्त र नीति कार्यक्रमको विषय टुंगिएको छ । पार्टीको मार्गदर्शक सिद्धान्त मार्क्सवाद लेनिनवाद रहनेछ भने कार्यनीति तथा कार्यक्रम नेपाली विशेषतासहितको समाजवाद रहनेछ ।

नेकपा माओवादी केन्द्रले माओवादलाई छाड्नेछ भने नेकपा एसले जनताको बहुदलीय जनवाद यसअघि नै छाडेको छ । अबको पार्टीको नीति तथा लक्ष्य नेपाली विशेषतासहितको समाजवाद रहनेछ । त्यसमा जबजका आधारभूत मूल्य मान्यताहरू यथावत् राखिएको नेकपा एसका नेताहरूले बताएका छन् ।

एकीकरणपछि बन्ने पार्टीको नाममा अन्तिम टुंगो लाग्छ बाँकी छ । तर नेपाल कम्युनिस्ट पार्टी समाजवादी वा नेपाली कम्युनिस्ट पार्टी समाजवादी नाम रहनेछ । पार्टीको नामको पछाडि समाजवादी भने राखिने वार्तामा सहभागी नेताहरूको भनाइ छ ।

नेकपा समाजवादी अर्कैको नाममा दर्ता रहेकाले वार्ताका क्रममा पार्टीको नाम नेकपा समाजवादी केन्द्र राख्ने प्रस्ताव पनि आएको थियो । तर नेकपा समाजवादी केन्द्रको छोटकारीनाम नेकपा ‘सके’ हुने भएकाले त्यो नाम नराख्ने र अहिलेकै नेकपा समाजवादी दर्ता गर्ने पक्षसँग छलफल गरेर टुंग्याइने भएको छ ।

पार्टीको नाम,नीति र सिद्धान्तमा सहमति भएपछि नेतृत्वको विषयमा अन्तिम सहमति जुटाउन प्रचण्ड र माधवलाई दिइएको छ । विप्लवले ढिला गरे पनि दुई पार्टीबीच भने ढिला नगरी एकता घोषणा गर्दा अरू घटकहरूसँग एकताको वातावरण बन्ने नेतृत्व तहको बुझाइ रहेको छ ।

नेतृत्वको विषयमा भने ‘प्रचण्ड’ संयोजक र माधव नेपाल सहसंयोजक बन्ने एउटा मोडालिटी पेश गरिएको छ । अर्कोतर्फ दुई अध्यक्षको विकल्प अघि सारिए पनि त्यो मोडालिटी पहिले नै असफल भएकोले त्यसतर्फ जान नहुनेमा दुवै पक्ष सहमत छन् । ‘विप्लव’सहितको एकता हुँदा अध्यक्ष मण्डलको प्रस्तावमाथि समेत छलफल भइरहेको छ ।

पार्टीको मुख्य नेतृत्व ‘प्रचण्ड र माधवले मिलाएपछि दुवै पक्षका पदाधिकारी मिलाएर सचिवालय बनाउने र अरू कमिटीहरू समायोजन गर्ने गरी छलफल अन्तिम चरणमा पुगेको छ ।