‘राजनीतिक षड्यन्त्र गर्ने र गराउने यो समय हैन, हामीलाई फुटाउन प्रयास नगरियोस्’- सुदन गुरुङ

काठमाडौँ । जेन जेड आन्दोलनका अभियन्ता सुदन गुरुङले हालका गतिविधि र राजनीतिक चलखेलप्रति असन्तुष्टि जनाउँदै राजनीतिक दलहरूलाई चेतावनी दिएका छन्।

मंगलवार उनले आफ्नो सामाजिक सञ्जालमार्फत सन्देश जारी गर्दै आन्दोलनलाई कमजोर पार्ने, बदनाम गर्ने र हिंसात्मक रूप दिने प्रयासहरू अस्वीकार्य भएको स्पष्ट पारेका छन्।

गुरुङले भनेका छन् -“हामी कुनै पनि हिंसात्मक गतिविधिमा विश्वास गर्दैनौँ। हाम्रो नाम प्रयोग गरी आपराधिक गतिविधिहरू भडकाइँदैछ। त्यस्ता कार्य गर्नेहरूले कानुन बमोजिम सजाय भोग्नुपर्नेछ। हाम्रो आन्दोलन सधैँ शान्तिपूर्ण नै थियो र रहनेछ। त्यसैले त्यस्ता कार्यमा संलग्न नहुन र त्यस्ता कार्य हुन नदिन सबैलाई अनुरोध गर्दछौँ।”

उनले राजनीतिक शक्तिहरूबीच चलिरहेको आरोप-प्रत्यारोप र आन्तरिक विभाजनले जनआन्दोलनको मर्म नबिर्सन आग्रह गर्दै भने-“हामी राजनीतिक दलहरूलाई खबरदारी गराउन चाहन्छौँ , राजनीतिक षड्यन्त्र गर्ने र गराउने यो समय हैन। अब जनता जागिसकेका छन् हामीलाई फुटाउन कुनै प्रयास नगरियोस्।”

उनले आन्दोलनमा संलग्न युवाहरूलाई पनि संयमित रहन, अफवाहमा नफस्न र आफ्नो अभियानलाई शान्तिपूर्ण तरिकाले निरन्तरता दिन आग्रह गरेका छन्।