पर्यटनमन्त्रीमा लाक्पा फुटी शेर्पाको चर्चा

काठमाडौं । केही दिनमै प्रधानमन्त्री सुशीला कार्कीले मन्त्रिपरिषद् विस्तार गर्दैछिन् । अहिले त्यसका लागि सम्भावित नाम खोजी भइरहेको प्रधानमन्त्री कार्यालय स्रोतको भनाइ छ । स्रोतका अनुसार सम्बन्धित क्षेत्रमा अनुभव, योग्यता, क्षमता र विगतमा काम गरेको आधारमा उपयुक्त व्यक्ति खोजी भइरहेको छ ।

स्रोतका अनुसार पर्यटन क्षेत्रको विस्तार र विकासमा विगत ३ दशकदेखि उल्लेखनीय योगदानी पुर्‍याएकी लाक्पाफुटी शेर्पाको नाम विभिन्न विभिन्न क्षेत्र तथा व्यक्तिबाट पर्यटन मन्त्रीका लागि सबैभन्दा उपयुक्त र क्षमतावान भन्दै प्रधानमन्त्रीसम्म पुर्‍याएका छन् ।

सन् १९६४ फेब्रुअरी ५ मा सोलुखुम्बु जिल्लामा जन्मिएकी शेर्पाका तीन वटा पुस्तक ‘हिमालमा चालीस वर्ष’, ‘हिमालकी छोरी’ र आत्मकथा ‘फोर्टी इयर्स इन् माउन्टेन’ प्रकाशित भइसकेका छन् ।

सन् १९९३ मा पासाङ ल्हामु शेर्पासँगै सगरमाथा आरोहण दलमा रहेकी उनी सगरमाथा आरोहण गरिसकेकी छन् । उनी चेम्बर अफ कमर्शको कार्यकारी सदस्यसमेत भइसकेकिा छन् । उनले सुरुदेखि नै नेपालमा पर्वतीय विश्वविद्यालय बनाइनुपर्छ भनेर लविङ गर्दै आएकी छन् । नेपाल पहिलो पर्वतीय प्रशिक्षण प्रतिष्ठान सञ्चालनका लागि उनले लामो समय संघर्ष गरेकी थिइन् ।

हिमाल आरोहण सम्बन्धी अध्ययन गर्न उनकै पहलमा नेपाल माउन्टेन एकेडेमी स्थापना गरिएको छ । यस काममा पनि उनले ठूलो संघर्ष गरेकी छन् । नेपाल माउन्टेन एकेडेमी स्थापनाका लागि त्रिभुवन विश्वविद्यालयमा सम्बन्धन लिन जाँदा केहीले हाँसेर टारे । तर उनी यस काममा सफल भइन् । अब यसलाई विश्वविद्यालयका रुपमा विकास गर्न पाए हुन्थ्यो भन्ने चाहना उनको छ । उनले त्यस एकेडेमीमा ८ वर्ष कार्यकारी निर्देशकका रूपमा काम गरिन् ।

पछि उनलाई तत्कालीन पर्यटनमन्त्री प्रेम आलेले बर्खास्त गरे । अदालतले पछि उनलाई पुनः पदस्थापन गरेको थियो । सन् २०२२ मा पनि ‘अल्फा’ म्यागेजिनले उनलाई ‘इन्स्पायरिङ पर्सन’ भनी फिचर गरेको थियो ।

जेन–जीको आन्दोलनका क्रममा जेनजीहरूले पनि त्यत्रो तोडफोड गर्दा पर्यटकका कुनै पनि बाहनमा क्षति पुर्याएनन् । यसबाट नेपालीहरूको अतिथि देवो भवः प्रतिको निष्ठा देखिने बताउँदै नेपालको विकास पर्यटनबाटै बढी हुनेमा उनी विश्वस्त छिन् । ‘नेपालीहरूमा सेवाभाव प्राकृतिक रुपमा नै भएकाले यसलाई सरकारले बढीभन्दा बढी उपयोग गर्नुपर्छ’ उनले भनिन् ।