अर्थ मन्त्रालयद्वारा उखु किसानको ७५ करोड ४९ लाख अनुदान रकम निकासा

काठमाडौं । उखु किसानको आन्दोलनलाई सरकारले सम्बोधन गरेको छ । मंगलबार अर्थ मन्त्रालयले ७५ करोड ४९ लाख ३८ हजार २४० रुपैयाँ निकासा गरेको छ । अर्थमन्त्रालयले उखु किसानलाई अनुदानबापतको रकम निकासा गरेको हो ।

निकासा गरिएको रकम जिल्लास्थित कोष तथा लेखा नियन्त्रकको कार्यालयमार्फत् किसानको बैंक खातामा भुक्तानी हुने कृषि तथा पशुपन्छी विकास मन्त्रालयले जनाएको छ ।

मन्त्रिपरिषद्को बैठकले यस पटक उखु किसानलाई प्रतिक्वीन्टल ३५ रुपैयाँ अनुदान उपलब्ध गराउने निर्णय गरेको थियो । तर यो रकम प्राप्त हुन नसक्दा उखु किसानले आइतबारदेखि केन्द्रित आन्दोलन सुरु गरेका थिए ।

मंगलबार उखु किसानको आन्दोलनमा प्रमुख प्रतिपक्षी दल माओवादी केन्द्रका नेता नारायणकाजी श्रेष्ठदेखि नेकपा एकीकृत समाजवादीका अध्यक्ष माधवकुमार नेपाल, समाजवादी पार्टी (नयाँशक्ति)का अध्यक्ष डा. बाबुराम भट्टराई पुगेर एक्यबद्धता जनाएका थिए ।