देउवाले फरार सूचीमा रहेका यादवलाई पार्टी प्रवेश गराए, २४ घन्टा नबित्दै निकाले

काठमाडौं । नेपाली कांग्रेसका सभापति सभापति शेरबहादुर देउवाले तामझामका साथ बिहीबार नेपाली कांग्रेसमा प्रवेश गराएका महोत्तरीका देवेन्द्र यादवलाई २४ घन्टा नबित्दै शुक्रबार निस्कासित गर्नुपरेको छ ।

तत्कालीन सद्भावना पार्टी, राष्ट्रिय जनता पार्टी हुँदै लोसपामा आवद्ध भएका र पछिल्ला दिनमा निस्क्रिय रहेका यादवलाई नेपाली कांग्रेसका सहमहामन्त्री महेन्द्र यादव र मधेश प्रदेश अध्यक्ष कृष्ण यादवले देउवाको हातबाट टीका लगाई पार्टीमा प्रवेश गराएका थिए ।

मधेश आन्दोलनका क्रममा सशस्त्र प्रहरीका असई थमन विकको हत्या आरोपमा देवेन्द्र यादवसहित ७ जनालाई अदालतले जन्मकैद संजाय गरेको छ । जन्मकैदको संजाय सुनाइएका यादव फरार अभियुक्त हुन् । फरार अभियुक्त यादवलाई देउवाले पार्टी प्रवेश गराएको भन्दै सामाजिक संजालमा बिरोध भएपछि शुक्रबारै विज्ञप्ति प्रकाशित गरी कांग्रेसले निस्कासन गरेको हो ।
कांग्रेस महामन्त्री विश्वप्रकाश शर्मासमेतको उपस्थितिमा देउवाले उनलाई पार्टीमा स्वागत गरेका थिए ।

यादवलाई पार्टी प्रवेश गराउने कार्यमा महेन्द्र यादव र कृष्ण यादव लागेका थिए । उनीहरुले यादवमाथि फौजदारी अभियोग लागेकोबारेमा देउवालाई जानकारी नदिई विवादमा तानेका छन् ।

मधेस आन्दोलनका क्रममा ०७२ भदौ २५ गते आन्दोलनकारीले असई थमन विकको हत्या गरेका थिए । हत्या भएको ३ बर्षपछि २०७५ साउन २८ गते २८ जनाविरुद्ध कर्तव्यज्यान मुद्दा दर्ता भएको थियो ।

विकको हत्यामा महोत्तरी जिल्ला अदालतले ०८० मंसिर २८ गते ७ जनालाई जन्मकैदको सजाय सुनाएको थियो । ती ७ जनामा यादव पनि एक हुन् । यादव प्रहरीको फरार सूचीमा छन् ।