नागार्जुनका मेयर बस्नेत भ्रष्टाचार मुद्दामा दोषी ठहर, अख्तियारलाई सफलता

काठमाडौं । नागार्जुन नगरपालिकाका मेयर मोहनबहादुर बस्नेतलाई विशेष अदालतले भ्रष्टाचार मुद्दामा दोषी ठहर गरेको छ ।

विशेष अदालतका अध्यक्ष टेकनारायण कुँवर र सदस्य रामबहादुर थापाको इजलासले बस्नेतलाई भ्रष्टाचार मुद्दामा दोषी ठहर गरेको हो ।

बस्नेतले राजु कँडेलबाट ९ करोड २२ लाख रुपैयाँ लिएको ठहर गर्र्दै सम्पत्ति (शुद्धीकरण समेत दोषी ठहर गरेको छ । अपराधबाट आर्जित सम्पत्ति लुकाएको कसुरमा उनलाई दोषी ठहर गरेको हो ।

बस्नेतले १३ करोड १२ लाख रुपैयाँ ‘सम्पत्ति शुद्धीकरण’ गरेको ठहर विशेष अदालतले गरेको छ । बस्नेतलाई कैद सजाय तोक्नका लागि विशेष अदालतले असार १६ मा अर्को पेसी तोकेको छ । विशेषले मेयरपत्नी उर्मिलालाई सफाइ दिएको छ ।

अख्तियारको अनुसन्धान सफल

नागार्जुनका मेयर बस्नेतले २०७४ मै मेयरको टिकट कांग्रेसका नेताहरुलाई करोडौं खर्च गरी लिएका थिए । २०७९ मा पनि उनले भ्रष्टाचारबाट आर्जित रकम खर्चेर टिकट पाएका थिए । कांग्रेसको राजनीतिमा कुनै योगदान नभएका उनले मेयर भएदेखि नै भ्रष्टाचार गर्ने र सम्पत्ति थुपार्नतिर मात्र तल्लीन भएका थिए । उनको भ्रष्टाचारको सीमा नाघेपछि अख्तियारले अनुसन्धान गरी २०८१ पुस १४ गते मुद्दा दायर गरेको थियो । घरजग्गा कारोबारका क्रममा मेयर बस्नेतले पदमा कोलोनीका राजु कँडेलबाट घुस लिएको अनुसन्धानबाट खुलेपछि अदालतमा मुद्दा चलाएको थियो ।

सार्वजनिक पदको दुरुपयोग गरी बस्नेतले कँडेलबाट लिएको घुसलाई सम्पत्ति शुद्धीकरण गरी बस्नेतले अन्यत्रै लगानी गरेको अख्तियारले आरोपपत्रमा उल्लेख गरेको थियो । जुन विशेष अदालतले समेत ठहर गरेको छ । कँडेल पद्मा कोलोनी प्रालि र पद्मा मर्चेन्ट कम्पनी प्रालिका सञ्चालक हुन् ।

बस्नेतविरुद्ध घुस प्रकरणमा ९ करोड २२ लाख ४६ हजार ३२ रुपैयाँ बिगो कायम गरी ८ वर्षदेखि १० वर्षसम्म कैद र जरिवानाको सजाय मागदाबी गरिएको थियो । घरजग्गा कारोबारी कँडेललाई पनि अख्तियारले घुसबापतको रकम ९ करोड २२ लाख ४६ हजार ३२ रुपैयाँलाई बिगो कायम गरी कैद र जरिवानाको सजाय मागदाबी गरेको छ ।

व्यापारी कँडेलबाट लिएको घुस शुद्धीकरण गरेको अभियोगमा अख्तियारले बस्नेतविरुद्ध १३ करोड १२ लाख ७३ हजार ३२ रुपैयाँ बिगो कायम गरी कैद र जरिवानाको सजाय मागदाबी गरेर मुद्दा दायर गरेको थियो । शुद्धीकरण गरेको सम्पत्तिबाट बढे–बढाइएको सम्पत्ति जफत गर्न र पदमा रहेर कसुर गरेकामा थप सजायको पनि मागदाबी गरिएको थियो ।