कांग्रेस पदाधिकारी बैठक बस्दै, गृहमन्त्रीमाथि लागेको आरोपबारे छलफल हुने

काठमाडौं । नेपाली कांग्रेसको पदाधिकारी बैठक बस्दैछ ।

सो बैठक सोमवार बिहान ९ः०० बजे बुढानिलकण्ठस्थित सभापति शेरबहादुर देउवाको निवासमा बस्नेछ ।

समसमायिक राजनीतिक बिषय तथा गृहमन्त्री रमेश लेखक भिजिट भिषा प्रकरणमा बिबादमा परेपछि देउवाले पदाधिकारी बैठक बोलाएका हुन् ।

गृहमन्त्री लेखकको सचिवालय नै भिजिट भिसामा घुस असुलीमा मुछिएको छ । विपक्षी पार्टीहरुले गृहमन्त्री लेखकको राजीनामा मागिसकेका छन् । राजीनामा नदिएसम्म बजेट प्रस्तुत गर्न समेत अवरोध गर्नेसम्मको तयारी विपक्षी पार्टीहरुको छ । जेठ १५ गते बजेट प्रस्तुत गर्नुपर्ने सवैधानिक प्रावधान छ ।

केन्द्रीय कार्यालयका मुख्य सचिव कृष्णप्रसाद पौडेलका अनुसार पार्टीको क्रियाशील सदस्यता नवीकरण सम्बन्धमा हालसम्म भएका प्रगतिबारे छलफल गर्न पदाधिकारी बैठक बोलाइएको हो । पार्टी महामन्त्री गगन थापाको संयोजकत्वमा रहेको क्रियाशील सदस्यताबारे समितिले सो विषयमा पदाधिकारी बैठकमा जानकारी गराउने छ ।

क्रियाशील सदस्यबारे टुंगो नलाग्दा पार्टीको महाधिवेशन यो वर्ष नहुने अवस्थामा पुगिसकेको छ ।