मोहन बस्नेत निलम्बनमा पर्ने तेस्रो सांसद, रवि र टोपबहादुर जेलमा

काठमाडौं । नेपाल दूरसंचार प्राधिकरणको टेरामक्स प्रबिधि खरिद प्रकरणमा ३ अर्ब २१ करोडभन्दा बढी अनियमितता गरेको आरोपमा अख्तियार दुरुपयोग अनुसन्धान आयोगले मुद्दा दर्ता गर्नासाथ बिहीबारबाटै नेपाली कांग्रेसका सांसद मोहनबहादुर बस्नेत निलम्बनमा परेका छन् । बस्नेत निलम्बनमा पर्ने चौथा सांसद हुन् ।

भ्रष्टाचार मुद्दा दर्ता गर्नासाथ सांसद पद निलम्बन हुने कानुनी ब्यवस्था छ । उनी सिन्धुपाल्चोक २ बाट निर्वाचित सांसद हुन् । प्रतिनिधिसभाका चार सांसद बिभिन्न काण्डमा निलम्बनमा परेका छन् ।

जीबी राईका सूर्यदर्शन, स्वर्णलक्ष्मी, सुप्रिम लगायतका सहकारीको रकमश गोर्खा मिडियामा लगेर घोटाला गरेकोमा रास्वपा सभापति रवि लामिछानेबिरुद्ध मुद्दा दर्ता भएपछि उनी निलम्बनमा छन् । उच्च अदालत बुटवलको आदेशले उनी थुनामै छन् । रवि चितवन ३ बाट निर्वाचित सांसद हुन् ।

नेपालीलाई भूटानी शरणार्थी बनाएर अमेरिका पठाएको आरोपमा एमालेका सांसद टोपबहादुर रायमाझी पनि थुनामै छन् । उनी अर्घाखाँचीबाट निर्वाचित सांसद हुन् ।

छिपछिपे उपभोक्ता सहकारीको १६ करोड ६९ लाख अपचलन आरोपमा राप्रपाकी सांसद गीता बस्नेतविरुद्ध गएको वैशाखमा पक्राउ पूर्जी जारी भएको थियो । फरार उनी संसदमा कहिल्यै उपस्थित भएकी छैनन् । प्रहरीले पक्राउ पनि गरेको छैन । उनी पक्राउ पूर्जी जारी भए पनि निलम्बनमा परेकी छैनन् ।

मनाङबाट निर्वाचित कांग्रेसका सांसद टेकबहादुर गुरुङबिरुद्ध भ्रष्टाचार ठहर भए पनि सर्वोच्च अदालतले अनौठो फैसला गरी निलम्बन फुकुवा गरिदिएको थियो ।