ओलीका सेनालाई पराजुलीको ब्यंग्य,प्रतिगमनका छोराछोरीले प्रतिगमनलाई प्रतिगमन भन्दैनन्, ‘बा’ भन्छन्

काठमाडौं । प्रधानमन्त्री केपी ओलीले ५ पुस २०७७ मा असंवैधानिक रुपमा प्रतिनिधिसभा बिघटन गरी अकंटक सत्तामा बस्न ग्य्राण्ड डिजाइनका साथ अगाडि बढेपछि त्यसको चौतर्फी बिरोध हुँदैआएको छ । संविधानमा सरकार बन्ने बिकल्प हुँदासम्म प्रतिनिधिसभा बिघटन गर्ने अधिकार सरकारलाई छैन भनेर आफ्नो राय ब्यक्त गर्न समेत नागरिकलाई निषेध गर्ने खालको दम्भी अभिब्यक्ति प्रधानमन्त्रीले प्रकट गर्न थालेका छन् ।

स्वयं प्रधानमन्त्री ओलीले भने प्रतिनिधिसभा पुनस्थापना हुनै सक्दैन, पुनस्र्थापना किन गर्ने ? तमासा देखाउन भनेर अदालतमा विचाराधनी मुद्दालाई सोझै हस्तक्षेप हुनेगरी अभिब्यक्ति दिएका छन् । तर चार पूर्व प्रधानन्यायाधीशले संविधानमा प्रतिनिधिसभा बिघटन गर्ने ब्यवस्था छैन भनेर आफ्नो धारणा सार्वजनिक गर्दा उनले ‘एकपटक अदालतमा जागिर खाएको भरमा बाहिर आएर जथाभावी नबोल्न चेतावनी दिएका छन् । उनको भनाइ थियो, ‘पोहोर, परार जागिर खाएको थिएँ र अहिले पनि जागिर खाएको छु भन्ने नठाने हुन्छ ।’ 

प्रधानमन्त्री पदको गरिमा नै बिर्सेर ओलीले नागरिकको अभिब्यक्ति स्वतन्तत्रतालाई संकुचित गर्न खोजेका छन् । ओलीले अदालतबाट संसद पुनस्थापना हुनैसक्दैन भन्न मिल्ने तर अरुले संविधानको कुरा समेत गर्न निषेध गर्ने ढंगले ओली अगाडि बढेका छन् ।

प्रधानमन्त्री ओलीले ५ बर्षसम्म भंग गर्न नपाउने प्रतिनिधिसभा भंग गरी संविधानलाई धुजाधुजा त पारेकै छन्, उनले त्यो संविधानमा भएको अभिब्यक्ति स्वतन्त्रताको पनि खिल्ली उडाएका छन् । ओलीलाई बा भन्ने महेश बस्नेत लगायतका अन्धभक्तहरुले त पूर्व प्रधानन्यायाधीहरुलाई साइबर सेना प्रयोग गरी गालीगलौज र धम्कीका भाषा प्रयोग गर्ने क्रमलाई तीव्रता दिएका छन् ।

महेश बस्नेतले केही दिनअघि साइबर सेनाका माध्यमबाट सबैलाई ठेगान लाउने धम्की दिएका थिए । राज्यशक्तिको दुरुपयोग गरी फेक आइडी खोलेर नेकपा प्रचण्ड–माधव समूहको बिरुद्ध गालीगलौज गर्ने काम पनि यही समूहले गर्दैआएको छ ।

यस्तो अवस्थामा लोकतन्त्र बहालीमा अग्रपंक्तिमा डटेका कवि अर्जुन पराजुलीले ओलीको प्रतिगमनलाई सटिक ब्ंयग्य गरेका छन् । कवि पराजुलीले लेख्छन्–‘प्रतिगमनका छोराछोरीले प्रतिगमनलाई प्रतिगमन भन्दैनन् ‘बा’ भन्छन् ।’ 

कवि पराजुलीको यो पंक्ति अहिले सामाजिक संजालमा भाइरल छ ।