खुकुरी प्रहार गर्ने वडाध्यक्ष वलीको समूह उन्मुक्तिका लागि चलखेलमा, भोलि सर्वोच्चमा पेशी

काठमाडौं । खुँडा र खुकुरी प्रहार गरी ज्यानै मार्ने नियतले सर्वसाधारण नागरिकमाथि आक्रमण गर्ने बाँकेको राप्तीसोनारी–२, का वडाध्यक्ष ज्ञानेन्द्रराज वलीको समूहले सर्वोच्च अदालतबाट मुद्दा जित्छु भन्दै पुनः स्थानीयलाई आतंकित पार्न थालिसकेका छन् ।

१ भदौ, २०८१ मा वडाध्यक्ष वलीसहित नौ जनाले बाँकेको बिनौना चोकमा सुलभ मल्ल र सन्दीप विष्टमाथि खुँडा र खुकुरी प्रहार गरेका थिए । सन्दिप विष्टकी श्रीमती २८ वर्षीया चेतना पुरी विष्टले वडाध्यक्ष वलीसहित नौ जनाविरूद्ध ज्यान मार्ने उद्योगमा प्रहरीमा जाहेरी दिएकी थिइन् ।

बाँकेमा भएको सुलभ मल्ल र सन्दिप बिष्टमाथि सांघातिक आक्रमण गर्ने  वलीको समूहमाथि कारबाहीको माग गर्दै जनप्रदर्शन समेत भएका थिए । अपराधी वडाध्यक्षलाई कारबाहीको माग गर्दैै प्रहरी कार्यालयमा बिरोध प्रदर्शन भएकै कारण जिल्ला प्रहरी कार्यालय बाँकेले सत्यतथ्य अनुसन्धान गरी जिल्ला अदालत बाँकेमा मुद्दा दायर गरेको थियो ।

उक्त मुद्दाको सुनुवाइ गर्दै वलीसहित ९ जनालाई पुर्पक्षमा पठाएको थियो । वडाध्यक्ष वलीलाई जिल्ला अदालत बाँके र उच्च अदालत नेपालगंजले ज्यान मार्ने उद्योगमा वलीसहित ९ जनालाई दोषी ठहर गरी पुर्पक्षमा पठाएको छ । जिल्ला र उच्चले पुर्पक्षमा पठाएपछि आरोपितहरु धरौटी माग गर्दै सर्वोच्च पुगेका थिए ।

सोही मुद्दाको पेशी शुक्रबार सर्वोच्च अदालतमा तोकिएको छ । मुद्दा फैसला नहुँदै वडाध्यक्ष ओलीको निर्देशनमा गुण्डानाइकेहरुको समूहले प्रधानमन्त्री केपी शर्मा ओलीको नाम लिंदै मुद्दा जित्ने निश्चित भएको भन्दै राप्ती सोनारी नगरपालिका वडा नम्बर २ का बासिन्दामा आतंक सृजना गर्न सुरु गरेको आरोप छ ।

सर्वोच्च अदालतमा उनीहरुको मुद्दाको पेशी शुक्रबार(चैत १५)मा राखिएको छ । मुद्दाको फैसला नहुँदै प्रधानमन्त्री ओलीसँग आफ्नो निकट सम्बन्ध रहेकाले सेटिङ मिलिसकेको र मुद्दा जित्ने निश्चित भएको भन्दै वली र उनको गुण्डागर्दी समूहको राप्ती सोनारीमा आतंक सुरु भएकोमा स्थानीय त्रसित छन् । वली एमालेको तर्फबाट वडाध्यक्ष भएका हुन् ।

वली र उनको समूहको सांघातिक आक्रमण गरी हात, कान लगायतका अंग काटिएका पीडित सन्दिप बिष्टकी श्रीमती चेतना पुरी विष्टले भनिन्–आफ्नो श्रीमानमाथि आक्रमण गर्नेलाई जिल्ला अदालतले पुर्पक्षमा पठाउने आदेश दिइसकेको छ । उच्चले जिल्ला अदालत बाँकेको फैसला सदर गरेको छ । तर वलीको समूह धरौटीमा छुट्नका लागि सर्वोच्च अदालतमा पुगेको र शक्तिको आडमा मुद्दा जित्ने निश्चित भएको भन्दै हिंड्न थालेपछि आफूहरु त्रसित भएको बताइन् । उनले सर्वोच्च अदालतबाट पनि न्याय पाउने ज्यान मार्ने गरी आक्रमण गर्नेलाई कारबाही हुने आशा रहेको बताइन् ।

वलीको समूहले आफ्नो श्रीमानको दुबै हात काटिएको छ, घाँटी झन्डै खुकुरी प्रहार गरी वलीले छिनालेका थिए, कान काटिएको छ । मेरो श्रीमान मर्नु न बाँच्नुको अवस्थामा हुनुहुन्छ । मेरो यति सानो बच्चा छ, सासु हुनुहुन्छ, नन्द हुनुहुन्छ, मैले कसलाई सम्हाल्ने ? यस्तो नृशंस आक्रमण गरी मेरो श्रीमानलाई मरणासन्न अवस्थामा पुर्याउने वलीहरुलाई धरौटीमा छोडियो भने म आत्मदाह गर्नेछु । बलिन्द्र धारा आँशुका साथ पुरीले भावबिह्वल हुँदै आफ्नो श्रीमान मात्र होइन, ३ बर्षको छोरा, सासु र नन्दलाई समेत काटेको बिलौना गरेको भिडियो भाइरल छ । यस्ता अपराधीहरुले पैसा र शक्तिको आडमा उन्मुक्ति पाए भने भोलि को सुरक्षित हुन्छ ? पुरीले भिडियोमा भनेकी छन् ।

नेपालगंजबाट नेता र दलालहरुले सर्वोच्च अदालतमा मुद्दा सेटिङ गर्न लागेकोमा पनि बिष्टको परिवार चिन्तित छ । पक्राउ नपरेका फरार अपराधीहरुले खुलेआम टिकटक हालिरहेका छन् । तर प्रहरीले पक्राउ गर्न सकेको छैन । सत्ताको संरक्षणमा भएकाले उनीहरु पक्राउबाट जोगिन सफल छन् । फरार अपराधीहरुले खुलेआम टिकटक र सामाजिक संजाल चलाइरहेकाले जिल्ला अदालत र उच्च अदालतबाट न्याय मिलेको पीडित परिवारलाई डर त्रासको माहोल बनेको छ ।
आक्रमणकारी: ५  थुनामा, ४ फरार

सुलभ मल्ल र सन्दीप विष्टमाथि खुकुरी र खुँडा प्रहार गरी टाउको, हात र कान काट्नेहरुमा राप्तीसोनारी नगरपालिका वडा नं. २ का वडाध्यक्ष ३८ वर्षीय ज्ञानु भनिने ज्ञानेन्द्रराज वली, ३२ वर्षीय सन्दिप वली, ३२ वर्षीय रत्न भण्डारी, ३७ वर्षीय लोकेन्द्र डाँगी, ३० वर्षीय विशाल भण्डारी जेलमा छन् । उनीहरुलाई जिल्ला अदालत बाँके र उच्च अदालतले दोषी ठहर गरी पुर्पक्षमा जेल चलान गरिसकेको छ । घटनामा संलग्न पाँच जना नारायण डाँगी, बाला भनिने सन्तोष गुप्ता, नवीन भण्डारी, ऋषि देवकोटा र आगमन प्रताव सिंह अझै फरार छन् । उनीहरु फरार भए पनि टिकटक बनाएर पोष्ट गरिरहेका छन् । तर सत्ताको छायाँ परेको प्रहरीले उनलाई पक्राउ गर्न सकेको छैन ।