प्रभु साह र चक्रवर्ती कन्ठ
काठमाडौं । सहरी विकास मन्त्री प्रभु साहले एक सहसचिवलाई गाडी नदिएकै भरमा सरुवा गरेका छन् । सहरी विकास तथा भवन निर्माण विभागका सहसचिव चक्रवर्ती कन्ठलाई गाडी नदिएकै कारण उपत्यका बिकास प्राधिकरणमा काजसरुवा गरिएको छ । मंगलबार मन्त्री साहका पीएले रौतहटमा जानका लागि विभागमा गाडी मागेका थिए । रौतहटमा सानसौकत देखाउनका लागि मन्त्री साहले विभागका गाडीको लावालस्कर लाउन मागेका थिए ।
मन्त्रालयका लागि २ लाख रुपैयाँ तिरेर मर्मत गरिएको गाडी विभागका निमित्त महानिर्देशक पदम मैनालीले यसअघिका मन्त्री कृष्णगोपाल श्रेष्ठलाई नदिई कन्ठलाई दिएका थिए । बुधबार मन्त्री साहले उक्त गाडी माग गर्दा सहसचिव कन्ठले नदिएपछि १ घन्टामै उनको सरुवा उपत्यका विकास प्राधिकरणमा गरिएको छ ।
सहसचिव कन्ठ विभागको योजना महाशाखाका प्रमुख हुन् ।
