टेलिकमका अधिकृतबाटै छिमेकीमाथि सांघातिक आक्रमण

विष्णुप्रसाद होमागाई

मलंगवा । नेपाल टेलिकमको वायरलेस सेवा निर्देशनालय अन्तर्गत आठौं तहमा कार्यरत रामनरेश रायले छिमेकी सुनन्दन देवीको घरमा गएर कुटपिट र ढुंगामुढा गरी वितण्डा मच्चाएका छन् ।

कानूनबमोजिम नक्सापास गरी बनाइएको सुनन्दन देवीको घरबाट बाटो माग गरेका रायले नपाएपछि बितण्डा मच्चाएका हुन् । सुनन्दन देवीको कम्पाउण्डभित्रको जग्गाबाट जबर्जस्ती बाटो माग गर्दा उच्च अदालत जनकपुरले मन्जुरी बिना नचलाउनू-नभत्काउनू भन्ने आदेशसमेत जारी गरेको छ । तथापि आदेशबिपरीत रायको परिवार अपराधिक कार्यमा लाग्दै आएको छ । साथै सांघातिक आक्रमणमा उत्रिएको प्रष्ट देखिन्छ ।

यही माघ ३ गते रायले छिमेकी सुनन्दन देवीका श्रीमान् उपेन्द्र ठाकुर ललितपुरको शंखमुलस्थित कारखानामा काम गरिरहेको अवस्थामा सर्लाहीको मलंगवास्थित घरमा गएर हातपात गर्ने र लाठीसहित हुल नै लिएर घरमा ढुंगामढा गर्न लगाएपछि स्थानीय प्रहरी चौकीका इन्चार्ज प्रहरी सहायक निरीक्षकको नेतृत्वमा प्रहरीले भ्यानमा राखि कार्यालय पु¥याएर थुनामा राखेको थियो ।

आठौं तहका अधिकृत नै अपराधिक धन्दामा लागेपछि जिल्ला प्रहरी कार्यालयका अधिकृतहरु नै तीनछक परेका छन् । थुनामा परेपछि कुटपीट गरी तर्साएर छिमेकीलाई जबर्जस्ती बाटो दिन लगाउने उनको योजना तुहिएको छ । तथापि आफ्नो जागिर नै जाने भन्दै रोइकराई गरेपछि अधिकृत रायलाई जिल्ला प्रहरी कार्यालयमा कागज गरी छाडिएको छ । मलंगवा नगरपालिका वडा नम्बर ४ मा नक्साबिनै घर बनाएका रायले बाटो नभएको जग्गा खरिद गरेका हुन् । अहिले स्थानीयले उनको नक्साबिनै बनाएको घर भत्काउन निवेदन दिने बताएका छन् ।

यसरी रायले श्रीमती सोवितादेवी यादवलाई लाठी, ढुंगा र इट्टा लिएर छिमेकीलाई मारपिट गर्न पठाएका थिए । उनी काठमाडौंको छाउनीस्थित वायरलेस सेवा निर्देशनालय अन्तर्गतको जावलाखेलबाट जागिर बिदा लिएर मलंगवा पुगेका हुन् । सत्यको पक्षमा बोल्ने अर्का छिमेकी सत्य नारायण चौधरीलाई रायको अपराधिक समूहले कुटपीट गरेको भिडिओ प्रष्ट देख्न सकिन्छ । तथापि उनले पहुँचकै भरमा घरेलु हतियार लिएर जाँदासमेत छुट पाएका छन् ।

रायलाई यो अवैध कामका लागि वडाध्यक्ष रविन्द्र यादवले सहयोग गरेका छन् । वडाध्यक्ष यादवले आफ्नी छोरीको विवाह अधिकृत रायको छोरासँग हुने निश्चित भएपछि उनको पक्षमा लागेको बुझिएको छ । रायका हुनेवाला सम्धी वडाध्यक्ष यादवले नै जिम्मा लिएर प्रहरी हिरासतबाट छुटाएका छन् ।

यसरी जागिर जोगाइदिन हारगुहार गरेपछि जिल्ला प्रहरी कार्यालय सर्लाहीले कागज गरी छाडिदिएको हो । उपेन्द्र यादवको संघीय समाजबादी पार्टीबाट टिकट पाएका यादव एकपक्षीय ढंगले रायका पक्षमा निर्णय गर्दै आएका छन् । रायले हुल नै लिएर कुटपीट गरेको भिडिओ सुरक्षित छ ।

अधिकृत राय लाठीसहित लिएर जाँदा एक कुनामा लुकेर बसेका थिए । श्रीमतीले भने पहेलो रंगको लाठीले सुनन्दन देवीको पक्ष लिएको भन्दै अर्का छिमेकी सत्य नारायण चौधरीलाई लाठीले हानेको भिडिओमा प्रष्ट देखिन्छ । यस विषयमा तपाई अधिकृत तहको कर्मचारी छिमेकीलाई सांघातिक आक्रमण गर्न भन्दै लाठी लिएर जाने हो ? भन्ने प्रश्नमा राय भन्छन् गाउँका मुखिया र भद्रभलाद्मी राखेर मिलापत्र गरिएको हो ।

अधिकृत रायका विरुद्धमा अख्तियारमा उजुरी

टेलिकमको आठौं तहमा कार्यरत रायले झण्डै १० करोडको अकूत सम्पत्ति जोडेको भन्दै अख्तियार दुरुपयोग अनुसन्धान आयोगमा उजुरी परेको छ । अधिकृत रायले अवैध तरिकाले काठमाडौंको धोबीघाटमा साढे तीन तलाको महल, मलंगवा नगरपालिका वडा नम्बर ४ मा एउटा घर र सर्लाहीमै तीन विघा जमिन जोडेका छन् । उनले अन्य सम्पत्ति नातेदारका नाममा पनि राखेको बुझिन आएको छ । यही माघ ३ गते उनले टेलिकमकै आठौं तहमा कार्यरत भएर अकूत सम्पत्ति कमाएको उजुरीमा उल्लेख छ ।