प्ले अफ समीकरण पूरा भएपछि एनपीएलमा आज ब्रेक

काठमाडौं । आज नेपाल प्रिमियर लिग (एनपीएल) का कुनै पनि खेल हुने छैनन् ।

एनपीएलमा प्लेअफको समीकरण पूरा भएकाले एकदिन खेलमा ब्रेक लिइएको हो ।

बुधवार भने सुदुरपश्चिम रोयल्स र जनकपुर बोल्टसबीचमा प्रतिस्पर्धा हुनेछ । सुदूरपश्चिम १२ अंकसहित शीर्षस्थानमा छ भने जनकपुर १० अंकसहित दोस्रो स्थानमा रहेको छ । सुदूरपश्चिम ७ खेलमा ६ जितसहित शीर्ष स्थानमा रहेको छ भने ५ जितसहित जनकपुर बोल्ट्स दोस्रो स्थानमा रहेको छ ।

उता, लिग चरणको अन्तिम खेलमा सुदूरपश्चिमसँग पराजित भए पनि कर्णाली याक्सले रन रेटका आधारमा प्लेअफमा स्थान बनाउने टोलीमा गनिएको छ । जसअनुसार ४ खेलमा जितसहित चितवन राइनोज तेस्रो र समान ४ जितसहित कर्णाली चौथो स्थानमा रहँदै प्लेअफको यात्रामा रहेका छन् ।

अब शीर्ष स्थानमा रहने दुई टोली सुदुरपश्चिम र जनकपुरले पहिलो क्वालिफायर खेल्नेछन् भने तेस्रो र चौथो स्थानमा रहने टोलीले एलिमिनेटर खेल्नेछन्, जहाँ चितवन र कर्णाली मैदानमा उत्रनेछन् । जसको समान अंक ८–८ रहेको छ ।

क्वालिफायर र एलिमिनेटरका दुबै खेल बुधबार नै हुने नेपाल क्रिकेट संघले जनाएको छ ।