तिहारमा स्वदेशी फूल उत्पादक किसानलाई प्रोत्साहनः प्लाष्टिकका फूल बिक्रीमा प्रतिबन्ध

काठमाडौं । तिहारमा प्लाष्टिकको फूल बिक्री बितरणमा रोक लगाउन काठमाडौं महानगरपालिकाका मेयर बालेन्द्र साह(बालेन) लागेका छन् । महानगरपालिकाका मेयर साहले काठमाडौंका ४६ स्थानमा स्वदेशी फूल बिक्रीको प्रबन्ध गरिएको बताएका छन् । उनले ती फूल बिक्री गर्ने स्थानसमेत उल्लेख गरी सामाजिक संजालमा राखेका छन् ।

मेयर साहले लेखेका छन्–काठमाडौँ महानगरपालिकाले स्वदेशमा उत्पादन भएका फूलको बिक्री–बितरणलाई व्यवस्थित गर्न यस वर्षको दिपावली, नेपाल संवत् तथा छठ पर्वका अवसरमा महानगरपालिका क्षेत्रभित्रका ४६ स्थानमा बिक्री वितरण प्रबन्ध गरेको छ ।

लाष्टिकजन्य फूल तथा सजावटका सामग्री बिक्री–बितरणमा रोक लगाउँदै स्वदेशमा उत्पादन भएका फूलको व्यापारलाई प्रवर्धन गरिएको हो । गएको वर्ष पनि हामीले प्रदर्शनी मार्गको भृकुटीमण्डप, तीनकुने चउर, हाँडीगाउँ र बालाजु विष्णुमती कोरिडोरमा फूल बिक्री गर्ने स्थान मिलाइएको थियो । त्यस ठाउँमा पुग्न महानगर प्रहरी बलको सवारी साधन उपयोग गरिएको थियो । गएको वर्षको सिकाइ र अभ्यासबाट यस वर्ष फूल विक्रेता किसानहरूलाई सहज बनाउने प्रयास हुनेछ । यसका लागि मल, मार्ट, पार्क, पार्टी प्यालेस, सेन्टरहरूमा व्यवस्था मिलाइएको छ ।

कहाँ कहाँ पाइन्छ स्वदेशी फूल ?

स्वदेशी फूल व्यापारी किसानहरूले आफूलाई पायक पर्ने स्थान छनोट गरेर विक्री गर्न सक्नुहुनेछ । यसका लागि सम्पर्क व्यक्तिको नम्बर वा महानगर प्रहरी बलको क्षेत्रबाट पनि सहजीकरण काम हुनेछ ।

जानकारीका लागि काठमाडौं महानगरपालिकाको निःशुल्क नम्बर ११८० मा कल गर्न सक्नु हुनेछ । वा नगर प्रहरीको हटलाइन नम्बर ०१५९०१७६३, ९८५१३५६५०९ मा कल गरेर थप जानकारी लिन सक्नु हुनेछ ।

यससँगै हामी व्यापारीहरूलाई फूल तथा अन्य सजावटका सामग्री विक्री वितरण नगर्न नगराउनुहुन अनुरोध गर्दछौँ । यदि कसैले लुकिछिपी विक्री गरेको पाइएमा प्रचलित कानुनबमोजिम कारबाही हुनेछ यससँगै सम्पूर्ण उपभोक्ताहरूलाई स्वदेशी फूल खरिद गरेर नेपाली किसानहरूलाई प्रोत्साहन गर्नुहुन अनुरोध गर्दछौँ ।