आध्यात्मिक पर्यटन प्रबन्ध गर्न गोसाईंकुण्डमा योग शिविर

रसुवा । आध्यात्मिक पर्यटन प्रबन्ध गर्न गोसाईंकुण्डमा योग शिविर सम्पन्न भएको छ । पर्यटनको लागि गोसाईंकुण्ड साधनाको तपोभूमि मानिने यो क्षेत्रमा न्यु भिजन नेपालले योग शिविर सम्पन्न गरेको हो । योगका साथै,  गोसाईंकुण्डमा पूजा हवन योग कुमारी साथै मन्जुरी नृत्यसमेत प्रस्तुत भएको थियो ।

उक्त शिविरमा पूजा हवन, योग ध्यान र न्यु भिजन नेपालकी सचिव सवनम खड्गीले  कुमारी डान्स साथै मन्जुरी नृत्य पनि प्रदर्शन गरेकी थिइन । न्यु भिजन नेपाल का अध्यक्ष अशोक शर्मा भट्टले याेग सिकाएका थिए । काठमाडौँ महानगर कार्यपालिका सदस्य मिना सुनार र  वडा न १८ वडाकी वडा सदस्य रचना शर्मा सहित १७ जना सहयोगी थिए ।

पर्यटन बाेड, कुमारी बैंक, प्रभु बैंक, नेपाल बैंक, गोसाईंकुण्ड गाउँपालिका, अल नेपाल एक्क्रसन, गरिमा भ्याज तथा पालिका लाइभ डटकमको सहकार्यमा यो शिविर सम्पन्न भएको हो ।  गत महाशिवरात्रिको अवसरमा सिन्धुपाल्चोक पाँचपाेखरीमा सम्पन्न गरिएको कार्यक्रमको निरन्तरता साथै आउने दिनहरूमा पनि नयाँ योजना रहेको न्यु भिजनका अध्यक्ष भट्ट बताउँछन् ।

गोसाईंकुण्ड रसुवा जिल्लामा रहेको चर्चित धार्मिक पर्यटकीय गन्तव्य हो। गोसाईंकुण्डलाई शिव कुण्ड पनि भन्ने गरिन्छ। समुन्द्र सतहबाट करिब ४ हजार ३८० मिटर उचाइमा अवस्थित कुण्डमा दशहरा र जैन पूर्णिमा मेला लाग्ने गर्छ। धार्मिक, जैविक, विविधता, ऐतिहासिक, पर्यटन र सांस्कृतिक महत्वसँगै गोसाईंकुण्ड क्षेत्रमा १०८ वटा कुण्ड रहेका छन् । यी कुण्डहरूमा गोसाईंकुण्ड, भैरव कुण्ड, सरस्वती कुण्ड, गणेश कुण्ड, दुधकुण्ड र सुर्जे कुण्ड प्रख्यात छन् ।

धार्मिक मान्यता अनुसार समुद्र मन्थन गर्दा उत्पन्न भएको कालकुट विषको असरबाट पृथ्वीलाई बचाउन भगवान शिवले विष पान गरे। विष पानबाट शिवलाई जलन र छटपटी भयो । यसलाई शान्त पार्न शिव गोसाईंकुण्ड पुगे र आफ्नो हातमा रहेको त्रिशूल पहाडमा गोब्दा निस्किएको जलले नुहाई शान्त भए । त्यही जलबाट बनेको कुण्ड र त्यहाँको मनोहर दृश्यबाट शिवलाई लोभ्यायो र गोसाईंकुण्डमा सयन गरे भन्ने धार्मिक मान्यता रहेको छ । त्यसै कारणले गोसाईंकुण्डमा स्नान गर्नाले जन्मान्तर देखिको पापबाट मुक्ति मिल्ने, मनले चिताएको कुरा पुग्ने जनविश्वास रहेको छ ।