हनी ट्रयापिङ प्रकरणः इन्स्पेक्टर शाहीलाई पक्राउ गर्न अदालतको अनुमति

काठमाडौं । हनीट्रयापिङमा पारी एक ब्यापारीसँग ३० लाख रुपैयाँ असुलीमा विवादमा परेकी प्रहरी प्रभाग ललितपुर भैंसेपाटीकी तत्कालीन प्रहरी निरीक्षक (इन्स्पेक्टर) बिनुकुमारी शाहीलाई पक्राउ गर्न अदालतले अनुमति दिएको छ । प्रहरीले शाहीलाई प्रहरी पक्राउ गर्न अनुमति लिएपछि उनी फरार भएकी छन् ।

‘हनी ट्रयापिङ’ मा पारेर ब्यापारीलाई ३० लाख रुपैयाँ असुली गरेको घटनामा इन्स्पेक्टर शाहीको प्रत्यक्ष संलग्नता देखिएपछि प्रहरीले ललितपुर जिल्ला अदालतबाट पक्राउ अनुमति लिएको हो ।

बलात्कार मुद्दामा फसाइदिने भन्दै ब्यापारीसँग लेनदेन गरेको आरोप लागेपछि उपत्यका प्रहरी कार्यालय, रानीपोखरीले उनलाई १० असोजमा जिम्मेवारीबाट हटाएको थियो । उक्त घटनाबारे जिल्ला प्रहरी परिसर, ललितपुरले छानबिन समिति बनाएको थियो । समितिको प्रतिवेदनपछि उनलाई उन्मुक्ति दिन खोजिएकोमा बिरोध भएपछि निलम्बन गरिएको थियो ।

अहिलेसम्म ‘हनी ट्रयापिङ’ घटनामा चार जनालाई प्रहरीले पक्राउ गरिसकेको छ । पक्राउ पर्नेमा सुष्मा विक, ताज मुल इस्लाम, भीमादेवी थापा र प्रहरी सहायक हवल्दार महेन्द्र हमाल छन् । प्रहरीले उनीहरूमाथि आपराधिक लाभ सम्बन्धी कसुरमा अनुसन्धान गरिरहेको छ ।

हनीट्रयापिङ प्रकरणमा जिल्ला प्रहरी कार्यालय सुनसरीका तत्कालीन एसपी कमल थापाको संलग्नताका बारेमा पनि डीएसपी नरहरि अधिकारी नेतृत्वको समितिले प्रतिवेदनमा उल्लेख गरेको भए पनि उनलाई उन्मुक्ति दिइएको छ । उनी अख्तियार दुरुपयोग अनुसन्धान आयोगमा कार्यरत छन् ।