तस्करी नियन्त्रण गर्न नसकेपछि पर्साका सशस्त्रका एसपी तानिए

सन्तोष मिश्र

काठमाडौं । सशस्त्र प्रहरी बल नेपाल नं. १३ गण, हेडक्वाटर पर्साका गणपति प्रहरी उपरीक्षक किसन कर्माचार्य हेडक्वार्टर तानिएका छन् ।

संगठनले दिएको जिम्मेवारी निष्ठापूर्वक बहन गर्न नसकेको, बीरगंज भंसार र पर्साको सीमावर्ती क्षेत्रबाट हुने अवैध र संस्थागत तस्करी नियन्त्रणमा समेत प्रभावकारी भूमिका नखेलेको लगायतका अनेकौँ गुनासा एवं खबर सशस्त्र प्रहरी प्रधान कार्यालय एवं गृहमन्त्रालयसम्म पुगेपछि बुधवार सशस्त्र प्रहरी उपरीक्षक कर्माचार्यलाई हेडक्वार्टर फिर्ता बोलाइएको स्रोतले जनाएको छ ।

सशस्त्र प्रहरी उपरीक्षक किसन कर्मचार्य ७ महिनादेखि नं. १३ गण, हेडक्वाटर पर्सामा थिए, समयावधि नपुग्दै तानिएएका एसपी कर्माचार्यको ठाउँमा सशस्त्र प्रहरी प्रधान कार्यालयबाट राधेश्याम धिताललाई पठाउने निर्णय गरिएको स्रोत बताउँछ ।

केही दिनअघि मात्र वीरगंज भंसारस्थित सशस्त्र प्रहरी बल नेपाल प्रस्तावित गुल्ममा कार्यरत सशस्त्र प्रहरीका असईसहित तीन जनालाई निलम्बनको सिफारिससहित छिन्नमस्ता बाहिनी मुख्यालयमा पठाईएको थियो ।