प्रहरीमा गृहमन्त्रीको चर्को हस्तक्षेप : आईजीपी बिदेशमा हुँदा प्रहरीका उच्च अधिकारीको सरुवा

काठमाडौं । प्रहरी महानिरीक्षक बसन्तबहादुर कुँवर विदेशमा भएको समयमा नेपाल प्रहरीका ६ एसएसपी र एक डीआईजीको सरुवा भएको छ । डीआईजी दुर्गा सिंहलाई गण्डकी प्रदेशको प्रहरी प्रमुखमा सरुवा गरिएको छ । एसएसपी बसन्त रजौरेलाई जिल्ला प्रहरी परिसर काठमाडौं र सानुराम भट्टराईलाई काठमाडौं उपत्यका अपराध अनुसन्धान कार्यालयमा सरुवा गरिएको छ ।

परिसरका प्रमुख एसपी भूपेन्द्र खत्री र अपराध अनुसन्धान कार्यालयका एसएसपी सोमेन्द्रसिंह राठौरको आठ महिनामै सरुवा भएको छ । खत्री र राठौर प्रहरीमा काबिल अधिकृत मानिन्छन् । उनीहरुको कार्यसम्पादन राम्रो हुँदाहुँदै ८ महिनामा सरुवा गरेर गृहमन्त्री लामिछानेले प्रहरीमा राजनीतिक हस्तक्षेप गरेको टिप्पणी भइरहेको छ ।

त्यस्तै, कोशी प्रदेश तालिम केन्द्र विराटनगरमा एसएसपी अभिनारायण काफ्लेलाई पठाइएको छ । कोशी प्रदेश तालिम केन्द्रका प्रमुख एसएसपी राजेन्द्रप्रसाद भट्ट ३ महिनामै तानिएका छन् ।

आईजीपी कुँवर सोमबार फ्रान्सको लियोनमा हुने इन्टरपोलको सम्मेलनमा भाग लिन फ्रान्स गएका छन् । आईजीपी देशमा नभएको समयमा डीआईजी र एसएसपीको सरुवा गरिएको छ । एसएसपी र डीआईजी सरुवा मन्त्रीस्तरीय निर्णयका आधारमा हुन्छ । तर पनि आईजीपीको सहमतिमा मात्र सरुवा गर्ने परम्परा तोडेर गृहमन्त्री लामिछानेले उनी विदेश भएको समयमा सरुवा गरेका छन् ।

एक प्रहरी अधिकृतले भने–‘आईजीपी स्वदेशमै भएको समयमा वा उनी फर्किएपछि सरुवा गर्दा आकाशै खस्ने थिएन, तर उनी विदेश भएको समयमा नेपाल प्रहरीका काबिल मानिएका एसएसपीहरुको सरुवा गरिएको छ । आईजीपीलाई निरीह पात्रका रुपमा चित्रित गरिएको छ ।’

गण्डकी प्रदेशमा डीआईजी रिक्त भएकाले सरुवा हुनुलाई सामान्य मानिए पनि एसएसपीहरुको सरुवा ८ महिनामै गरिनुले गृहमन्त्री लामिछानेमाथि राजनीतिक हस्तक्षेप गरेको आरोप लागेको हो ।