प्रहरीमा लेखापाल सरुवाको तयारी, बालुवाटार र गृहको हस्तक्षेप नहुँदा पनि बोलकबोल कायमै !

काठमाडौं । नेपाल प्रहरीमा लेखाअधिृकत र लेखापाल सरुवाको लागि दौडधूप सुरु भएको छ । प्रहरीभित्र लेखाको सरुवामा ठूलो दबाब र प्रभावले काम गर्ने गरेको छ ।
प्रहरीका एकेडेमी, उपत्यका ट्राफिक कार्यालय, केन्द्रीय अनुसन्धान ब्यूरो(सीआईबी) र प्रहरी अस्पतालका लेखाअधिकृतको २ बर्ष पुगिसकेको छ । यी चारै ठाउँमा लेखाअधिकृत हुनका लागि चर्को दौडधूप भइरहेको छ ।

आईजीपी दानबहादुर कार्की आगामी असार २१ गते एक कार्यक्रममा भाग लिन अमेरिका जाने भएकाले त्यसअघि नै लेखाको सरुवा गर्नका लागि आन्तरिक लेखापरीक्षण शाखाले मापदण्ड अनुसारको सूची बनाइसकेको छ । अब त्यो सूची आईजीपी कार्कीकोमा पुगेर फाइनल भएपछि लेखाको सरुवा हुनेछ ।

विगतमा प्रधानमन्त्री कार्यालय, गृहमन्त्री, सचिवदेखि प्रहरी महाशाखाको प्रमुख(सहसचिव)हरुले समेतको दबाब लेखाको सरुवामा पर्ने गरेको थियो । तर यसपटक बालुवाटारदेखि गृहमन्त्रालय कतैबाट पनि लेखाको सरुवामा दबाब पर्ने अवस्था देखिंदैन । शक्तिकेन्द्रको दबाब नपर्ने भएकाले आईजीपी कार्कीले लेखाको सरुवा निष्पक्षतापूर्वक गर्न पाउनेछन् ।

गतबर्ष दाजुको आडमा बरिष्ठ सई रुपक थापाले लेखाको सरुवामा ब्यापक चलखेल गरेको चर्चा भएको थियो । यो बर्ष लेखापालको सरुवा निष्पक्ष हुने अपेक्षा प्रहरीमा गरिएको छ । तर यमकला केसी नामक महिलाले आईजीपी कार्की र उनका निकटस्थहरुको नाममा लेखाको सरुवामा मोलतोल गरिरहेको स्रोतको दाबी छ । स्रोतका अनुसार एक जिल्लाका प्रहरी अधिकृतकी श्रीमतीसमेत रहेकी उनैले लेखाको सरुवाको डिल गरिरहेकी छन् ।

विगतमा महालेखा परीक्षक बिष्णुबहादुर केसी, उपमहालेखा परीक्षक बद्रीबहादुर कार्कीदेखि बिभिन्न नेता, मन्त्री, गृहका उच्च अधिकारीको दबाब पर्दा आईजीपीले नै आफूले राख्न चाहेको लेखापाल वा अधिकृत नसक्ने अवस्था उत्पन्न हुन्थ्यो । प्रहरीको लेखा तालिम लिएर प्रवेश गरेपछि ३० बर्षसम्म नै जिल्ला जिल्लामा लेखापाल हुने गरेको थियो । तर उपेन्द्रकान्त अर्याल आईजीपी भएपछि पहिलो बर्ष नै ८ बर्षमात्र लेखामा काम गर्न पाउने नीति ल्याए । दोस्रो बर्ष अर्यालले ६ बर्षे मापदण्ड लागू गरिदिए । जुन मापदण्ड अद्यापि लागू छ । ६ बर्ष मापदण्ड लागू भइरहेको भएपछि दबाब त कम हुन थाल्यो । तर पनि आकर्षक जिल्ला वा कार्यालयमा सरुवा हुन चलखेल हुने गरेको छ ।